周圍Art – BoDW ’08

 

Inno Design Tech Expo 2008

每年十二月香港都會舉行BoDW，目的係想提昇香港喺亞洲作為創意及設計中心嘅地位，佢地每年都邀請到好多世界級大師嚟講talk，分享吓佢地嘅作品同對設計嘅睇法。香港嘅創意、設計人真喺有福囉，唔駛山長水遠，一次可以聽到及睇到咁多大師嘅精彩演說同獨特嘅見解。所以我每年都會帶D學生去，今年我就揾咗Gary老師幫手帶添。

BoDW每年都以一個國家做主題，記得上年喺意大利，再上年喺英國，而今年就喺荷蘭。我喺英國讀書時都去過荷蘭，仲租左架單車遊覽咗Amsterdam添，佢地D單車設計認真特別，平時我地D單車個煞車(brake)咪喺用手嚟控制嘅，荷蘭果D喺用腳架，向前踏當然架車就向前，反方向踏就喺煞車！初初真喺勁唔慣，好多次都爭d PK 😦 呢次真喺第一次親身接觸荷蘭嘅design，唔知現在荷蘭d單車仲喺咪咁呢？荷蘭人(Dutch)比我一個感覺喺好friendly同好open (不過我就唔可以好似佢地咁鐘意將成條生嘅Herring 入口吞落肚，加擰檬汁都好腥)。睇「大國屈起」DVD時知道荷蘭人做生意同HK人都一樣咁靈活同有頭腦，Stock Exchange都喺d Dutch諗出黎應付佢地航運嘅需要。

我喺個展覽影咗好多相，最有趣嘅喺每日都有d設計難題比幾組大學生去解決，每組大學生都有一半成員喺外國大學生(相信喺荷蘭大學生)，完成嘅proposal每日四點都會喺一個佈置到似個Boxing(拳擊) ring去present比公眾睇同批評。呢個challenge都幾有意思，可以訓練d學生點樣同一班陌生人用英語喺有限嘅時間之下去解決一個design problem，等我有機會都攪d類似嘢比我d學生玩吓先！

我今日喺明珠睇到RTHK一個電視節目”The Works“，今集都節錄咗一個好成功嘅Dutch Designer Marcel Wanders 佢嘅talk，佢話Designer一定要有Curiosity 好奇心，我絕對同意！

PS: 成日話HK喺乜乜亞太資訊中心，點解果d咁正嘅talks的videos冇放上網？就算06或07年果d都好呀，外國好多conference事後都會放d Video上You Tube架，失望 😦 。

神探伽俐略 Suspect X

神探伽俐略電影版

放假of course去行街、睇戲、食飯咁啦，輕鬆一下。走咗去睇呢套戲，五點幾場，入座率都唔錯，以乎有唔少福山雅治嘅粉絲。套電視劇間中我都有睇吓，都喺一般啦，邊會有咁有型嘅物理教授架！

講番套戲，我未睇過本原著小說，基本上呢套唔喺偵探故事，因為佈局好早都估到d，呢套其實喺一個愛情悲劇故事，堤真一演孤獨及潦倒嘅數學天才石神演得好好，比福山雅治好，一心想睇湯川同內海有冇愛情線就會失望喎。日本片都有d通病, 好多時都拖得太長，呢套戲成219分鐘呀！節奏緊凑d會好d。同埋導演都冇利用電影嘅特點，套戲大可以喺電視或dvd睇，無需入戲院睇。仲有，點解日本或韓國片裡面所描述嘅愛情唔喺K型就喺被壓抑嘅呢？

今年聖誕都冇乜大片喎… 荒失失奇兵2 (Madagascar2) d 對白就笑死人(我睇英文版)。睇完順便影左商塲聖誕裝飾d相。

X'mas Deco at Festival Walk

周圍Art – Carrie Chau

Carrie’s work at Times Square

唔知喺咪因為西九嘅關係，近幾年好多人都想同藝術扯上關係，尤其是各大地產商，姑勿論佢地嘅出發點喺乜，始終對一眾Artist及普羅大眾來講都喺好事。時代廣場就請咗位本地Artist鄒蘊盈Carrie佈置一下，我建議同學仔可以去睇吓，一來喺免費，影吓聖誕相，二來睇吓佢嘅作品，其中喺D展品中有提到Carrie小小嘅背景，大家不妨留意一吓，Carrie細細個似乎已經目標清晰，知道自己將來想做乜。

西太后都有個展覽喎，等我得閒去睇吓先。

ITMA – 多謝捧場！

ITMA總結

光陰似箭，一個學期十五個禮拜好快又過咗去啦，十八号嘅大考作為呢科嘅總結，幾佰份卷我果部份終於KO咗！飲得杯落！

回想起呢科喺我初初返工時要喺好短既時間之內攪出嚟，當時面對好多未知因素，例如電腦室的設備，學生背景及一般IT嘅水平，同埋想用零budget去攪…等，不知不覺個course都run咗幾年，我都不停作出修改，希望學生可以好輕鬆嘅氣氛之下學習，今年我亦加咗幾個新題目，例如資訊保安及Web2.0等。我喺學期中都做過一個簡單調查，同學對呢科都頗滿意，其實睇吓D相片，都可以知道上堂氣氛喺幾好啦 🙂 講真我都遇到好多好比心機上堂及認真嘅同學，相信佢地已經向成功嘅目標邁進緊！

當然我會繼續改進呢個科目，盡量做到最好！同學們歡迎您的意見！

PS: 網絡上有好多有心人仕花咗好多心機寫咗好多高質數嘅Freeware或open source software，做福社會，ITMA亦因此得益，同學亦因此得益，所比我要向呢d無私嘅程式員致敬！

PPS: 上堂都遇到好多騎呢嘢，學堂真喺社會嘅小縮影，真喺乜人都有㗎。就算考試都喺架…可能我太out啦。

大學入學面試十大常見問題

from 明報

喺好耐以前嘅明報save落嚟，放喺道比同學們參考一吓。要記住面試好多時會用英文架。Good luck!

虛儗中大留倩影

中大影相話咁易!

學校對我吔非常支持，批咗筆$比我地攪個細嘅Studio可以玩吓Chroma Key做吓特別效果。經過一番心血，個7樓Studio終於可以啓用啦！

啊Pat同Gary教PAD同學嘅IPCA，上堂講開Special Effects個題目，好多同學都對Chroma Keying好有興趣，所以我地邀請咗D同學仔去個studio影相。我諗吓諗吓，想佢地玩得更加投入，又諗吓佢地嘅願望會喺乜哩? 我諗佢地嘅夢想一定喺入中大升學啦！好，又比我揾到D中大校園嘅靚相，於事叫Photoshop鬼才Gary出馬，幫佢地key左張相去中大幅相度,哈哈, 睇下key得幾好,唔洗搭火車過沙田都可以去中大影相啦，又因為考試將近，我地將D相印成心意卡送比同學，希望佢地見到呢幅中大相，可以鞭策自己勤力讀書，有一日著住中大嘅畢業袍喺中大實景影畢業相！咁多位同學仔努力D,以中大為目標!!你得嘅!

同場加映-幕後花絮

課外活動:參觀Blue Lotus Gallery

Blue Lotus Gallery

我地不時會同SAO合作攪吓活動，比D同學吸收吓課外知識。喺10月尾啊Pat老師就帶左一班同學仔去參觀art gallery, 就係位於火炭嘅Blue Lotus gallery, 今次個展覽嘅作品都係出自年青人, 而且好巧合地全部都係女仔! 同學睇多d關於art或者design嘅展覽係好有幫助架~ 因為可以從人地嘅作品度偷師, 有助你地第時要設計時有更多reference, 多角度去思考事物,多d idea去設計!~

星級導師 星級學生

Good Students - Good Teacher

我地其中一位極受歡迎嘅星級老師啊Pat趁就快大考，同D同學輕鬆一下，於是邀請佢地上嚟十樓影吓相，並且許個願。啊Pat話祝所有PAD同學學業進步，考試順利。

Observe! You’ll find opportunites

我喺英國讀書時，有好多不同國籍嘅同學，令我眼光鄺闊不少。例如我遇到一D從土耳其、伊朗、約旦、非洲…等地方嚟英國進修嘅同學，從交談中可以知道佢地國家嘅風土人情，同埋佢地嘅宗教，佢地當中有好多喺回教徒(Muslim)。相信好多人都知回教徒喺唔食豬肉，或者你地會知佢地會喺回教曆嘅第九個月(大概西曆8至9，或9至10月，或10至11月)成日唔食嘢(Fasting)嘅齋戒月(Ramadan)，如果比我成日唔食嘢的話一定會腳仔軟同發育不全。仲有你地可能會少D知嘅就喺佢地要一曰下跪五次向神(Allah)禱告，所以我果間大學有一個房間專為回教徒禱告而設，裡面有地毯，最重要嘅就喺心口嘅方向一定要朝向聖城麥加(Mecca)，如果你去過一D酒店你司能會見過房裡有個大箭號，佢就喺比回教徒禱告的正確方向，好多國際機場而家都有呢D禱告室。

點解我要講呢樣呢?我無意中發現Casio出咗隻專比回教徒帶(如左圖售價大概港幣五佰蚊)嘅手錶，佢喺比D旅遊中嘅回教徒知道向邊個方向祈禱同埋提醒佢地祈禱嘅時間。相信呢樣產品帶比回教徒不少方便！

所以話我地應該盡量擴濶自己嘅眼光，可以去外地讀書或生活一段時間就最好啦，唔可以嘅話去多D旅行(唔喺跟團)，甚至睇記錄片都有用。機會其實處處都有，要睇你既觀察力夠唔夠，有冇本事去發掘新市場！

PS:其實香港商人都試過用宗教做個Market Segment，記唔記得有架機細細部，一開著就會頌D佛經，呢部嘢都令到好多香港廠家發咗達架。

Silicone Molding

喺Product Design Studio果科，高Sir又整左D嘢比班Year 2產品嘅同學玩，今次佢地喺玩用矽膠倒模。睇番d相都覺得有少少恐佈，咁可愛既公仔被虐待…

我要「頂」！

頂得最多書者勝!

做個成功嘅產品設計師需要無限創意是必然的，另一樣更重要嘅就喺點樣喺有限嘅資源下去提出一個完滿嘅解決問題方案去佔領市塲。資源可以包括人力、時間、金錢。

呢堂Product Deisgn Concept and Application (PDCA)， 我就參照咗一個喺工程科頗流行嘅Project去挑戰我地Year 1嘅Product Design學生，詳情:

每人分發3張咭紙及12粒釘書機釘，在2小時內要砌一個最高及可以承托最多書本嘅結構。結果係幾出人意表~原來唔洗搞咁多野,簡簡單單兩至三條柱就可以乘托好多書!

我一路觀察D同學點樣去解決問題，有計劃及觀察力強既同學通常會做得比較好。呢兩樣嘢亦都係今次呢個Project想帶出嘅信息之一。呢一堂D同學都玩得好開心，等我得閒再諗多D有益又考腦筋嘅習作挑戰吓佢地先。

PS 我自己之後用咗半個鐘都做咗個，當然喺勁過哂佢地個D啦 🙂 ！！

“M” 型學堂?

我成日去星際果間專賣內地書籍的書店逛吓，貪內地書平又好快有新書。

最近買咗幾本大前研一嘅著作，其中最出名我又閱讀過的有「M型社會」、「即戰力: 如何成為世界通用的人才」…等。喺「M型社會」本書，大前發現日本社會開始走向兩個極端:富裕及貧窮，中產階級開始由社會支柱变為小數的一群。两、三年前有人講香港都有步向”M”型的趨勢。大前比人稱為「趨勢大師」、「策略先生」、「管埋大師」…等。 佢07年受貿發局邀請到香港講talk，一小時嘅talk嘅酬金好似話要幾十萬(大師即喺大師)，佢提出香港和澳門應該結盟(當時主流意見喺香港應該與珠三角結盟)。當然以澳門今日嘅情況嚟，呢個諗法可能要再修改啦。

我點解要提出大前呢個概念呢？因為我觀察到呢幾年我教既學生們都有走向”M”型的趨勢:學生唔喺好勁就喺好水，中間成績D學生就愈來愈少。喺我讀書嘅時代，學生的成績喺Bell shape的。

呢個觀察是否普遍呢？如果喺，我哋教學及行政上應該作出點樣既修改去配合呢？

同學們，如果只有两個極端，我相信你一定會話揀成績好的一端，問題喺：你今日做咗D乜嘢去達到呢個目標呢？

許願樹Make a Wish

今個聖誕有好多願望想實現?
咁就要快d上黎10樓IT School度許番個願啦~
學業,愛情,健康,家庭,咩願望都好~都可以寫上去~
好多同學已經寫左佢地嘅願望,掛上聖誕樹度啦!
快d叫埋同學仔上黎啦!

科學 輪迴 Science n Afterlife?

宇宙之偉大 人類的渺小

今日同十五樓班同事食晏，舊同事啊「謝飛」都有嚟。我地呢班知識分子行埋一齊就會講吓國家大事、琴棋書畫、政治金融，科學宗教…等題目 😛 。今日就講開佛教所提出嘅三世：前世、今世及來世。我就試用科學方法去嘗試解釋一吓，愛因斯坦話 E=mc² 佢將mass同energy聯埋起嚟，宇宙嘅能量喺一個常數Constant，所以喺宇宙裡面嘅東西(包括我地)嘅能量喺唔會無端端唔見咗嘅，因為咁樣，我地死後的能量亦喺唔會唔見，只喺我地會由一個型態-身體(今世)，轉去做另一個型態(來世)，至於來世型態喺乜，彿教思想話只要你喺今世做多D好事，積多D福，投胎就可以將你嘅energy轉返做人型，呢個process就叫「輪迴」(Reincarnation)，如果你成日篤人背脊，砌人生豬肉，講是講非，顛倒黑白，大話連頁…咁你下世未必可以輪迴做人或甚至動物添！罪大惡極嘅你嘅energy只能在這個茫茫宇宙中做個遊魂野鬼 😐 永遠在這個漆黑嘅宇宙中孤獨地漂浮！因果循環，善有善報，呢個喺佛家想宣陽的信息。肥仔「力奇」老師似乎心想我番話有D料到，對住個熱辣辣嘅流砂飽沈思咗好耐…

Merry Christmas to all our stakeholders!

Season’s Greetings

Ho Ho Ho!

This season’s greetings is for the happiest of all holidays to you.

This is a good opportunity to thank you for giving comments on our programme for improvements.

We wish you and your family all the joys of a great Christmas Season, and the very best for the coming Near Year!

With warm wishes from the School of IT and Digital Design.

Dec 2008

聖誕快樂！我地School想同各位學生,家長, 老師講聲Merry Christmas!!感謝你地為學生勞心勞力!另外, 亦都想多謝所有幫助過我吔嘅朋友及同事~以及收左我地畢業生嘅各方院校,多謝你地俾佢地機會去繼續進修,為踏入社會做足準備! 在此希望你地有一個開開心心的聖誕節及新年!!

(我已寄出好多封有我親筆簽名嘅聖誕卡，因環保關係，只能寄出有限數量，請見諒！但無論是紙卡或電子化，都是同樣衷心的)

ITMA Q&A Session

温習時間又到啦！

日期:16 Dec 2008

時間: 14:00-15:00

地點: Room 1005 (座位有限)

自由參加，但出席前請記住:

1. 千祈咪問我有冇貼士，我唔係馬評人。其實你有留心上我每一堂，都應該知道重點在那裡。
2. 請先温書一遍，看有什麽不明白才問我，否則會浪費大家的時間。
3. 試題分佈平均，不會偏側于某一方的。
4. 考試型式分三部份，少量MC，有Short and Long Questions。
5. 全英語作答，請帶香港考試局認可計算機。

“Criminal Minds”

Good TV drama

我除咗喺Sci-fi嘅fan屎之外，仲好鍾意睇偵探片潻(我有諗過做偵探架，喺用腦去捉賊個種，唔喺揸支鎗拉人個隻)。ATV World最近每逢星期六、日9點播緊呢套劇集，內容喺講一班犯罪學心理學家點樣去智擒一D罪大惡極嘅連環殺手，劇力都幾緊張。美中不足喺ATV播緊Season One, 喺2005三年前架！裡面D電腦、手機好out啊 😦 美國已經播緊Season 5啦！

講開又講，亞視最近轉咗啊頭，作為觀眾，我極希望電视節目可以多源化，唔喺一台獨大，淨喺播埋D畫公仔畫到出腸嘅低Ｂ戲。「魔童」基，其實ATV World只需要買D有水準嘅外國劇集，如”24″, “Dr. House”, “CSI”, “Heroes”, “Prison Break” (只有Season 1好睇)…etc. 我實撑你架！(最後換埋ATV中文台D記者姐姐啦！佢哋適合做幕後多D 🙂 )

厠所文章? 同學門加油！

比心機、你得嘅！

最近你到九樓及十樓男、女厠所時，會見到洗手盆鏡上的標語及厠格D爛gag。我嘅動機喺乜呢？唔通想防礙你地做神聖的大、小二事？

厠所喺一個好私人嘅空間，你喺會自己解決只有自己先可以解決嘅問題(特殊癖好除外)，呢個空間可以比你一個人冷靜一下，洗個臉後清醒一下，想一想未來的三、五年想走一條怎樣的路。所以咪利用呢個機會同大家互勉一下囉！

D格言我喺由一本書引用出來，對我哋同學應該合適，我喺呢道再重覆一次，比冇機會嚟欣賞我哋個厠所D朋友都可以分享一吓。

The person who doesn’t make mistakes is unlikely to make anything.

Winning isn’t everything, but wanting to win is.

If you get stuck, draw with a different pen.

同學們，無論你喺讀緊Year 1或2，都要比心機讀好D書，攞個好成績，咁樣升間好嘅大學機會都會大D。記著，你地今日嘅所做嘅一切，就喺決定你未來三到七年行條乜嘢嘅路:懶惰的話，你未來條路一定會喺崎嶇及辛苦架！！！！

The Day The Earth Stood Still

Save our planet now!

大家都可能知我喺Sci-fi嘅fan屎，今日去睇咗套戲，戲院都有八成入座率。其實呢套嘢喺翻拍1951年同名嘅經典電影，我喺英國讀書時喺Channel 4電視睇過，08重拍版保留咗個大機械人同個著suit嘅外星人使者。我覺得個故事同人物都比較單簿，最精彩的片段喺trailers都睇過哂，所以都有D悶。

喺戲入面外星使者(奇洛里維斯Keanu Reeves演)去問一個中国智者，人類(又或指美国人only?)是否應該被terminate，Keanu 用國語講對白好攪笑。其實安排一個中國人去決定美國人(全人類)嘅命運是否反映咗中國既國力愈來愈大呢？呢一段戲喺十年前喺冇可能會發生嘅，記唔記得1996年有套戲叫Independence Day?結局喺好Cliché: 美国總統最後揸架戰機，统領大軍，將外星人太空船戰隊擊敗，拯救了全人類；此911之後，有好多美國人對自己在全世應該扮演乜嘢角色產生咗好多疑問。

呢套戲D英文對白都幾易明，同學不妨試吓聽吓學英文，有幾句對白Keanu講得好鬼形，其中一句:

If the Earth dies, you die.

If you die, the Earth survives.

呢個環保信息可惜無論喺套戲或現實世界中都冇被重視到。

人有相似

我哋School有位Year 1讀Computing嘅蘇同學，同埋讀Year 2 Computing嘅葉同學最近成日投訴比人眼超超… 有咁嘅事，社長一定要出馬查出原因，還同學們一個清白！終於比我揾到點解啦：

多年失散的兄弟

蘇同學，我想要部PS3；葉同學，我想要你個金牌 😛

User Friendliness or FriendliLESS?

我教個科PDCA第一堂就喺要同學攞架DC到校園周圍影吓佢地認為可以改善的設計，同學仔嘅觀察都幾仔細，亦提出不改善建議。如果設計喺改善生活，咁作為一個designer，就要有好強嘅觀察力及批判性。

大家不如睇下圖中的自動售票機有乜問題？幅相我喺睇完BoDW搭天星去TST在湾仔碼頭影嘅。

天星新安裝自動售票機

有怪獸啊！

怪獸入侵10/F

Year 1 Animation「保佁」同學連日四處搜集舊floppy disks，原來佢想整隻大怪獸食咗我地啊！快d走呀！

Creative Challenge – results

之前比咗個挑戰同學，叫佢地諗下idea去佈置一吓，結果得到一班熱心嘅同事及學生幫手，我地office樓層家陣充滿節日色彩，呢幾日有好多同學仔呀、其他部門同事呀、老師呀，一齊大合照、許願… 於事我再加碼，同Vincent放工之後去SSP買咗D閃閃燈、雪花同波波，現在好似成個海港城咁！多謝出過力嘅朋友！

比$都比得高興

喺呢道同大家拜番過早年：祝學業/事業進步，新年怏樂，同學們記住要比心机讀書！

Sting in HK

又有一位國際级大師來港表演！今晚就去咗保你大睇Sting嘅concert。今次好acoustic同埋d歌圍繞十五、十六世纪英國作曲家John Dowland。成個concert只喺用多重人声及两個Lute，Sting都同另一個大師一齊玩lute，我睇個lute都有十幾條線，佢同個大師都jam得吓喎。吾知點解聽lute時令我想起在英國時去過的castles，Robin Hood，羅蜜歐茱麗葉，Blackadder…

Sting現塲表現簡直同CD一樣，concert下半part唱咗一首Beatles嘅In My Life，跟住自已嘅Fields of Gold同Police時代嘅Message in a Bottle，8人和声加两個Lute好有英國舊宮庭味，觀眾反應好大，encore用個Lute solo咗首Blues作為總結。

觀後感：點解外國觀眾佔起碼85%以上？點解香港咁少歌手可以有好嘅現塲表現(莫講話識玩中樂)？點解外國歌手攪d新+舊crossover咁好效果？點解香港冇人試下用古代中樂crossover Canto Pop呢？心目中医神應該夠功力喎。

鯨吞天下

唔知點解，硬碟容量就好似錢一樣：永遠都嫌少！office嘅HD (60GB驚未)都早已爆哂，今曰把鬼火走去旺電買咗個「死鷄」1.5TB SATAII硬碟，想用Vista去format佢，點知由晚上八點format到第二朝早八點只喺60%到！把火，攞番公司用XP去攪，四個鐘攪掂咗！唔怪得Vista比人選為世纪最差嘅OS啦！

買之前知道第一批喺有問題，我呢個以乎so far冇問題。要留意多數外置HD盒只會support到最大1TB。唉！又冇咗成千銀啦 😦 真喺帶錢打工囉。其實計番每GB都喺$0.78到，算喺ok，不過2TB硬碟應該好快來臨。

中大工程學院講non-jupas入學事宜

喺11日12号，首屈一指嘅中大工程學院嚟同我地d同學介紹課程及非聯招入學要注意嘅地方。工程學院副院長何教授介紹佢地嘅威水史，教授及設備都喺世界級！同學仔真喺要比心機讀書爭取入去咁一流嘅大學及學院升學啊！我哋不少入咗中大工程學院d師兄會不時返嚟同你地打氣。何教授又指07/08年度工程學院收咗超過90個非聯招新生！

中大工程學院副院長(學生事務)何教授

爛Gag比賽-公投

早前舉辨既徵集爛gag比賽，反應非常踴躍，現請大家投出神聖的一票，選出本世紀最爛之gag！
截止日期為12月19日, 請各位大力支持!!!

選出爛gag的作者有神秘禮品一份！

老闆眼中的卓越員工(To be a good employee)

好多同學都會好快會投身社會，發展事業，怎樣可以在職場得心應手呢？

態度至為重要：

1. 敬業樂業
2. 肯承擔
3. 聰明才智
4. 積極進取
5. 適應能力
6. 創造力
7. 誠信可靠
8. 承受壓力能力
9. 思考力
10. 責任感
11. EQ 心理成熟度
12. 行業專門才能

以上其實都可以應用於在學的同學們，以上12項，你們的分數是多少呢？同事們，我們頂頭都有個老闆，我地以上12項的分數又如何呢？