VIPs visiting our School

東華三院高層參觀SIT (9June09)

羅太參觀SIT (2June09)

呢兩個星期都有貴賓參觀我地School，上個星期(2June)羅太黎我地學校參觀，順道到Studio參觀一下，羅太係學校嘅advisor，佢舊同事係我以前中學教過我嘅老師，世界真細小。我簡單介紹左我個School同埋一d同學嘅畢業作品，羅太好有心機聽同問左好多同創意有關嘅問題，希望佢同總部會繼續大力支持我地攪創意科目，始終攪呢d科目需要投資及long-term commitment!

一眾東華高層，包括李三元主席同陳婉珍第四副主席 ，亦喺今個星期(9June)到我地道參觀，我介紹幾位讀產品設計同學嘅畢業作品，李主席好有興趣，仲認為應該嘗試一下申請專利註冊，真正推出市塲試一下，我已經聯絡左呢位同學，希望好快就可以見到佢嘅產品係玩具反斗城有得賣！

教授級講座系列 – 何浩培教授

何浩培教授

我地舉辨一係列講座，邀請一d勁料教授黎深入淺出咁分享下佢地嘅想法。今次有中文大學工程學院Associate Dean何教授講下科技點樣影嚮生活，佢舉出好多例子點樣我地生活，例如電燈、電話、電與磁、光纖、半導体…等等嘅發明，何教授仲提出究竟科技點樣影嚮我地下一代呢？大家真係要諗一下，我地今日做嘅事影嚮緊我地嘅後代架！讀書方面，教授認為健康醫療同能源方面會有快嘅發展，有見及此，中大工程學院同醫學院會合作攪一個新嘅Degree in Biomedical Engineering，課程正積極籌備中，大概會有50名學額。佢仲提同學工程學院提供比較多嘅非聯招(non-jupas)學額。多謝何教授百忙之中抽出時間，同學們獲益不少。

科技與生活

High Flyers!

c.u.t.w.

今日幫PR影咗d學生相，呢d學生都係比大學取錄咗，有d同學會直入二年級，一分耕耘一分收獲，祝你地發光發熱，為社會作出貢獻！

小插曲：PR預備左部D80同支灯比我用，我見鏡頭好唔乾淨，用眼鏡布抹下，點知成塊鏡飛左出黎，邊個之前個死仔用殘咗唔出声！公家嘢都要愛惜麻，真不該 攪到我要用DC仔影，唔講唔覺哩！技術搭夠麻！

千手觀音?

Looking confident!

3-3-4 研討會

3-3-4 研討會

3-3-4教育改革快殺到埋身，為左比家長了解多d呢個身學制，五月九號星期六我地攪左個seminar，邀請咗不同區域嘅家長會黎聽吓，並且參觀下我地嘅設施。今次主講嘉實係中大訊息工程系黄寶財教授，我喺報紙成日拜讀黃教授嘅文章，佢一直都大力推行善用資訊科技於教學上，佢原來現場present好風趣架！除左解釋新學制，仲比d貼士家長們點樣教仔女讀書，好受家長歡迎！佢話教仔最緊要陪養佢地對讀書嘅興趣，等佢地有自學嘅習慣，佢亦都贊成小朋友要管、要有規矩，黃教授仲講電視、遊戲機及mp3係三大魔頭，我絕對同意！家長應該好好處理呢個問題，好多時個小朋友考到好成績就送部遊戲機比佢，佢無節制咁玩咪害左佢！

飯後同佢傾下，發覺黄教授係一個和藹可親、平易近人嘅人。家長們到我地個studio參觀，我順便介紹下我個school嘅教育理念比佢地聽下，佢地好有共鳴，都好有心機聽仲抄notes添，家長關心兒女前途係好事，事後我仲交換左卡片同Facebook account方便日後聯絡，幾十張卡片就咁派哂，要趕印多d囉

High Table Dinner at CUHK

隆重的晚宴

4月30號晚，我地攪咗個「高桌聚餐」，地點係景色怡人嘅中大Guest House, 如果你唔係中大職員係唔可以入去架！所以同學被邀請喺道食飯係榮幸，你睇d相就知佢地幾雀躍啦。餐廳風景唔錯，府瞰成個吐露港，喺中大讀緊嘅舊生同我地聚舊並勉勵現在讀緊嘅同學，仲有嘉賓伍達倫博士講吓佢點樣進修6個碩士學位添。

Company Visit – HKBN香港寬頻

香港寬頻，唔駛頭痕

讀書同教書都唔應該閉門做車，所以我盡量都會揾d香港做得好嘅公司，帶同學去見識一吓。香港被稱為亞洲電訊樞紐，我就諗不如去參觀ISP或Data Center，城市電訊其下嘅香港寬頻喺葵涌嘅中心參觀，首先由Justin同Calvin喺會議室講解一下香港寬頻點樣利用Optical Fiber提供穩定及高速嘅Internet服務比用户，最精彩係重温以前CTI到而家嘅電視廣告，可見CTI係一間有活力嘅公司，跟著我地就去參觀Network Operation Center，成個軍事基地咁，佢地7×24咁監控住個網絡，最後我地去咗參觀bbTV，同學都玩得好開心。

每一間公司都知道Branding嘅重要，亦會花好多資源攪好公司嘅形像，其實公司要提昇image，最容易忽略就係The First Contact Point(TFCP)，顧客對你間公司嘅像好多時由TFCP決定，根深蒂固，香港寬頻比我個印象非常好，由初初電郵聯絡到當日嘅安排，負責人Justin同Calvin都非常細心，我地對呢間公司嘅印像自然提高不少，真係要讚吓主席Ricky，我接觸個不少公司，好多時都會佢絕學校參觀，但Ricky明白到社會責任及TFCP的重要性。我留意到佢地辨公室嘅椅都係比一般Office Chair舒適(同昂貴)，周圍環境有d畫點綴一下硬崩崩的設備，亦知道公司安排導師替員工上課，幫佢地完成學位課程，員工做得開心，對客自然開心！但香港有幾多老闆做得到？ATV冇Ricky改革係損失。

東華三院邱子田記念中學 – 面試日

面談十五分鐘

今日Lunch Time到左屯門邱子田中學同一d同學做面試，之前二月都黎過介紹我地比同學認識，有d親切感。同學面試前都頗緊張，我先同佢地影番幅相舒緩下情緒，其實我會同佢地傾下，唔會好惡去揪稱人。佢地都好有禮貌，亦知道自己想怎樣，亦関心前途。同學如果現左已經有目標，其實已經踏入成功之門，我見過好多「過日神」嘅學生架，我相信邱子田有一班熱心嘅老師，先可以教出一班好學生。有兩位應屆AL學生，已經考左一、兩科，希望你地繼續努力，增取好成績；其餘應屆CE學生，好好利用呢個月嘅時間，唔好打咁多機、上咁多網、睇咁多電視，要盡全力，祝成功！

Computer Music Workshop 用電腦做音樂

如何用電腦做音樂

有好多人以為做音樂好難 (當然做好嘅音樂幾時都咁難)，自從有左個人電腦PC，做音樂嘅門檻下降左好多，就好似數碼相機咁，而家人人都可以啦。

我之前工作關係，認識左一d音樂人，同佢地傾下，佢地都係一班有理想嘅年青人。今日就請左其中一位朋友Thomas，借用Gary今日果堂IDD，黎同PAD同學分享一下點樣用科技創做音樂。

Thomas帶咗好多私伙架生黎demo，佢首先講吓如果同學需要set-up一個小型Home Stduio, 應該添置d乜野器材、唔同器材嘅選擇… 為咗同學可以接觸多d野，我地係1002添置左d外置Firewire-based音效卞M-Audio FW-410 行Sonar7 同Ableton5 Lite，夠哂用呀！

跟著佢就一個step一個step咁教d同學整loopings同multitrack，好多同學都可以喺短短兩個鐘頭之內都做到Thomas教過嘅嘢，相信佢地都有一個充實下午，遲d我post佢地d作品上黎先。

Music is life!

增值係列 – 電影特效工作坊

數碼特效工作坊

昨天早上我地係Hall玩咗”Cloning”，起初好多同學都覺得神奇，但係經過解釋之後，同學發現Photoshop係咁好玩嘅！而Photoshop喺我地個課程係主打軟件，做設計工作，Photoshop 技能就好似係食飯一樣：基乎係本能！

今次個workshop玩乜呢？之前cloning係做一幅相，今次就玩Video，我地會用一個做特效嘅軟件After Effects 試吓做星球太戰激光劍同龍珠龜波氣功嘅特效！After Effects喺我地個Creative Animation會教點用，出面做廣告、電影部成日用架，今次係一個好機會做一個初步嘅認識，名額有限，快d報名！

日期: 25 March 2009

時間: 3:00-6:00pm

地點: Room 1002

講者： Sam 大師

報名: 可以親自到 Room 1001，或在 Facebook 上 signup (itdd@cutw.edu.hk)

~~~~~~~~~~~~~~~~

[25 March 2009 update]

may the force be with you!

Sam大師首先講下特效喺電影嘅應用同埋少少歷史，跟著就教After Effects 一d基本功，然做大家一齊將我同Sam大師激光劍大戰個條片加工，佢地知道後期製作嘅威力！

下面呢條片就係成果，遲d有時間可以整條勁d嘅！

增值系列 – 學做簡單電腦特技 Teach you a simple movie digital effect

嘩原來係咁整出嚟

IT用途廣泛，喺電影道成日見到d天馬行空嘅嘢出現，例如最近個套Benjamin Button，入面都用咗好多數碼特技，Brad Pitt喺電影道一出世個頭咪好老嘅，你知唔知道套戲開始果一個鐘頭所出現嘅Brad Pitt個頭，喺由電腦做出嚟？睇吓呢條片就知啦。高手做嘅特技係用咗你都唔覺。呢d特技都要靠IT電腦去做出黎，今次我請左我個friend嚟示範一吓簡單嘅特技，喺電影道咪成日見到千軍萬馬嘅情況出現嘅？你估真係請咁多臨時演員？不可能嘛，佢地都係用電腦由十幾人clone到幾百人甚至幾千人出嚟架！

今次我地會示範一下用Photoshop將20樓個Hall填滿佢！！參加者將會成為呢次創舉嘅其中一份子，我吔首先會上20/F禮堂集合，影d相然後去Lab一齊用Photoshop試下整個特技出黎！最好你帶唔同嘅T-shirt啦、帽啦、褲啦，可以好快換唔同嘅服裝，等clone出黎唔會咁易比人認出嚟嚟去去都係個班人！ 今次應該好好玩同有野學，學而致用，名額有限，快d去10/F揾Miss Wong Wong報名。仲有，我個friend好好人架，佢喺電腦動畫、電影特技做咗好耐，同學可以問吓佢呢行嘅行情。

今次因時間關係，只可以做張相，其實可以做Video，我地School有一個行內常用嘅軟件，如果你讀我地嘅Creative Animation就有機會學，可以用埋個studio整特技出黎潻！

QR Code Teaser – 1 這是什麼〔一〕?

科技改变我哋生活習慣，並帶來好多新事物、新思維及新革命，你都可以成為Google或Apple架，只要有創意！我地就係鼓勵學生左、右腦並用，發揮創意。

照我吧！

用高科技同大家玩個遊戲，上面個圖叫做QR Code，喺曰本好流行，佢原理好似Bar Code咁，用圖像黎儲資料。點玩法呢？右手邊有兩個Java檔，download落你部手機道執行，然後用你部手機對住上面個Code影張大相咁你就知喺已嘢回事，有嘢睇不妨攞架手機上office比我睇吓，最多請你食嘢。(程式在測試階段，但Nokxx手機表現最好)

Camera, Aaaaaa…..ction!

拍攝正進行中

學校正拍攝新一輯嘅Video，喺二月七號嚟到我吔School拍啦，我地嘅演員有「蕃茄」、「肥麟」同啊Pat老師。個Video好快有得睇啦。

歡迎黄大仙區中學校長會

與黃大仙區中學校長會分享會

星期六早上，我地同一批由黄大仙區中學校長會嘅校長及Career Masters分享我地舉辦應用學習課程ApL同OLE嘅經驗，呢個題目引起咗一d討論。跟住就參觀咗我地嘅設施，我帶咗去吔去7樓参觀個Studio順便介紹我個School比佢地認識，佢地都聽到津津有味，派哂我d咭片潻。之後喺我吔嘅Canteen食飯，同一間中學嘅校長及老師同枱，交流咗好多意見，大家同意加強合作，畢竟我地都有相同教育理念同埋面對相同嘅問題。

有位嘉賓有d似李超人大公子啊澤鉅喎…

新春團拜

東華三院新春團拜

今日午時就去咗上環總部參加團拜儀式，今年係我第二年參加呢個咁莊重嘅活動，上年冇帶相機，今年就有啦，因為個禮堂好莊重，好有氣派，其實東華已經有一百三十多年的曆史啦，有幸被邀請，一定要把握機會用科技紀錄一下嘛。在塲有好多紀者，主席馬清鏗致賀年詞之後，幾位董事局成員就開始切燒豬儀式，好似話拜過神嘅燒豬係要食吓，我都搶咗幾舊！:-) 不過掛著影相同食燒豬，冇攞到開工利是啊！:-(

睇到禮堂有好多牌扁同對聯，其中有四個字覺得好有意思: 「善與人同」，網上解釋:

舍己從人，樂取於人以為善，把自己原有的立場與做法放棄，取他人所有的特質來成就善行，而這就是君子對他人所應有的責任。

OLE – Music Card Workshop II

一月十七號星期六，又係我地OLE時間，因為music card workshop受歡嘅關係，今次已經係第二次攪啦，你睇吓啊Pat教佢地幾開心，今次d同學係來自馬錦明慈善基金馬可賓紀念中學，相信佢地過咗一個充實又開心嘅上午！

DIY Music Greeting Card

CUHK Experience Day 中文大學體驗日

阿Pat老師今日帶咗d同學仔參觀中文大學工程學院，工作人員好耐心咁示範一吓佢地好好玩嘅IT Project，呢d projects都係中大同學嘅精心傑作，我地嘅同學都好有興趣，跟著就去咗中大圖書舘參觀，同學仔對中大Library印象深刻，圖書舘職員好用心解釋設施及用法，參觀完咗之後，我哋School喺中大就讀緊嘅舊生好有心，同佢地一齊tea吓，順便講吓喺中大嘅生活，share吓佢地當年入中大嘅過程同埋讀書心得，相信佢地過咗一個好充實嘅下午。

我地攪呢個活動喺想比同學親身體驗一下IT同Engineering嘅應用，認識多d，同埋親眼睇下中大嘅優美讀書環境，籍此激勵一下佢地，要攞好成績，以入中大為目標！我地要多謝中大職員作出安排，同埋我地d舊生，咁有heart同師兄妹傾吓前途問題。

如果仲有同學仔有興趣體驗一下中大生活，通知我地拉，我地試下安排多一次。

參觀中文大學工程學院

虛儗中大留倩影

中大影相話咁易!

學校對我吔非常支持，批咗筆$比我地攪個細嘅Studio可以玩吓Chroma Key做吓特別效果。經過一番心血，個7樓Studio終於可以啓用啦！

啊Pat同Gary教PAD同學嘅IPCA，上堂講開Special Effects個題目，好多同學都對Chroma Keying好有興趣，所以我地邀請咗D同學仔去個studio影相。我諗吓諗吓，想佢地玩得更加投入，又諗吓佢地嘅願望會喺乜哩? 我諗佢地嘅夢想一定喺入中大升學啦！好，又比我揾到D中大校園嘅靚相，於事叫Photoshop鬼才Gary出馬，幫佢地key左張相去中大幅相度,哈哈, 睇下key得幾好,唔洗搭火車過沙田都可以去中大影相啦，又因為考試將近，我地將D相印成心意卡送比同學，希望佢地見到呢幅中大相，可以鞭策自己勤力讀書，有一日著住中大嘅畢業袍喺中大實景影畢業相！咁多位同學仔努力D,以中大為目標!!你得嘅!

同場加映-幕後花絮

課外活動:參觀Blue Lotus Gallery

Blue Lotus Gallery

我地不時會同SAO合作攪吓活動，比D同學吸收吓課外知識。喺10月尾啊Pat老師就帶左一班同學仔去參觀art gallery, 就係位於火炭嘅Blue Lotus gallery, 今次個展覽嘅作品都係出自年青人, 而且好巧合地全部都係女仔! 同學睇多d關於art或者design嘅展覽係好有幫助架~ 因為可以從人地嘅作品度偷師, 有助你地第時要設計時有更多reference, 多角度去思考事物,多d idea去設計!~

許願樹Make a Wish

今個聖誕有好多願望想實現?
咁就要快d上黎10樓IT School度許番個願啦~
學業,愛情,健康,家庭,咩願望都好~都可以寫上去~
好多同學已經寫左佢地嘅願望,掛上聖誕樹度啦!
快d叫埋同學仔上黎啦!

人有相似

我哋School有位Year 1讀Computing嘅蘇同學，同埋讀Year 2 Computing嘅葉同學最近成日投訴比人眼超超… 有咁嘅事，社長一定要出馬查出原因，還同學們一個清白！終於比我揾到點解啦：

多年失散的兄弟

蘇同學，我想要部PS3；葉同學，我想要你個金牌

有怪獸啊！

怪獸入侵10/F

Year 1 Animation「保佁」同學連日四處搜集舊floppy disks，原來佢想整隻大怪獸食咗我地啊！快d走呀！

Creative Challenge – results

之前比咗個挑戰同學，叫佢地諗下idea去佈置一吓，結果得到一班熱心嘅同事及學生幫手，我地office樓層家陣充滿節日色彩，呢幾日有好多同學仔呀、其他部門同事呀、老師呀，一齊大合照、許願… 於事我再加碼，同Vincent放工之後去SSP買咗D閃閃燈、雪花同波波，現在好似成個海港城咁！多謝出過力嘅朋友！

比$都比得高興

喺呢道同大家拜番過早年：祝學業/事業進步，新年怏樂，同學們記住要比心机讀書！

爛Gag比賽-公投

早前舉辨既徵集爛gag比賽，反應非常踴躍，現請大家投出神聖的一票，選出本世紀最爛之gag！
截止日期為12月19日, 請各位大力支持!!!

選出爛gag的作者有神秘禮品一份！

Creative Challenge – What HK$500 can do?

我果五百蚊阿！:-(

我地學院有一班好有熱誠及充滿活力嘅同學(及教師hehe)，佢地成日都想攪D嘢，好啦等我私人醒5舊水比佢地攪D嘢玩吓先！

留意吓呢道，遲D會報導一下佢地攪咗乜出呢啦！