設計
設計作為職業 Design as career
最近有家長問我個女對設計好唔好，我睇佢就唔係好想個女讀設計，但個女就喺產品設計方面有talent同興趣；呢d個案都見唔少，好似前年咁，有好多家長千方百計咁叫d仔女讀會計、金融、財務科，家長們今年自從雷曼事件同金融風暴之後，就再冇叫d仔女讀呢一瓣，其實讀一科點可能知五、六年之後果行會點架！況且家長好多時對課程內容都唔明白就叫仔女去讀，當d家長一行開，d仔女會同我講佢地個真正想讀乜但歎耐何，其實家長們應該依佢地嘅興趣及能力去選擇課程，而唔係將你地想讀嘅課程投射喺仔女身上，試諗下叫你去讀兩年你冇興趣嘅課目，你一定讀得唔好架啦，咁對子女有乜好處呢？
香港嘅設計都好掂架，前一排港台有節目「志在設計」介紹傑出華人設計師，你知道General Motors首席汽車設計師係一位香港女性嗎？好多喺跨國公司，如BMW、Nike等，擔任高級設計師都係香港人，況且香港都有好多品牌已經國際知名。講返近一d，我地第一屆讀產品設計嘅Ivan已經憑自已力量創立咗自己嘅設計公司，佢嘅產品同設計己經行銷各地，上年暑假仲請咗我地兩位讀產品設計嘅同學到佢公司實習，又有人工，又有野學，呢位師兄真有心。
香港己經冇傳统製做業好耐，推動香港經濟就要靠高增值嘅產品，一個好嘅品牌就不可缺少，而好嘅設計就係打造品牌的重要原素；舉個例子，同樣一件白色T shirt，冇嘜頭個件就賣50蚊，有個Designer Label (例如”保羅‧史密夫”、”Agn*s b”…等)就可以賣成幾佰蚊，有時仲要限量添！
互聯網推動創業 Internet Drives Entrepreneurship
做design想創業比以前容易好多，以前一定要飛去世界各地做產品展銷活動，花費不少時間及金錢，而家有咗web就唔同啦，好多designers都係一、兩個人公司，利用互聯網發表作品，全世界任何一個角落都可以見到你設計嘅產品同埋可以做買賣添！Web真係減省咗好多開支，好多讀design嘅畢業生都自己做老闆，只需要一部電腦同互聯網，加上自己嘅創意，就自組公司接job，完全靠自己！
Web 2.0 and Design
上過我堂都大概知道Web 2.0嘅特點，最近睇本雜誌講一個網站幫你做設計師，創辨人西山浩平在97年創立咗「空想生活」網站，消費者有好嘅產品概念可以upload去呢網同人分享，如果有1,000個網民支持，便會將個設計交比生產商作考慮生產。喺2000年，無印良品(Muji)面對發展過度，新社長决定同西山合作，成立「空想無印」，收集消費者對無印產品嘅意見。
兩個網站目前共有10萬名會員，每月瀏覧人次高達40萬，網友將idea上傳，只要有1,000人支持，無印會考慮生產。西山話如果有1000人支持，市塲好大機會有數倍嘅需求，值得企業去研發。當無印接納網民的構想，出售每一件貨品其價格約1%會作版權費支付「空想無印」。而那1%的版權費，會根據工序被平均分為4部份—設計、市場推廣、製造及提供網上平台，後三者全由「空想無印」一手包辦，原設計者將得到那1%版權費中的四份之一。
每年收16萬版權費！
由2001年至今，網站提供的構思已經被製成80件無印商品。其中一件產品版權費最高，就係一個平平無其嘅cushion，連續四年成為銷量No.1產品，為設計者5年來每年收取約16萬港元的版權費！呢個cushion女設計師「柴田文江」都簿有名氣架。
除咗用紅筆之外，就用鉛筆改，office平時用開d鉛筆要刨，冇咁方便，襯食晏去中南買支機械(自動)鉛筆用下先。回想中學時代，邊有電腦用呀，上美術同繪圖堂時都會用到機械鉛筆，現在d學生好難想像要用T尺、圓規同A2紙畫嘢，我就係咁練得一手好字架，果陣時嘅文具市場未被日本製造拈據哂，高級嘅西德牌子就係班中有錢同學所採用，有冇聽過Staedtler, Faber-Castell 同 Rotring 呀？我就當然係窮鬼，只可以用日本Pentel P200，宜家仲有得賣架！長青design賣幾十年都得；會考繪圖我係攞A，証明係唔關器材嘅事，當時我地一致認為筆皇係黑色Rotring 600，成支六角形，宜家已經唔再出(ebay賣緊成千銀)，呢一代無人對筆有太大要求咯，電腦取代哂d手工嘢，欠缺一點浪漫。
Posted by 社長 
