Quality Assurance – Program Exam Committee Meeting

會議成員

今日開咗PEC啦，多謝各方代表出席。PEC係一個正式渠道討論我地教學嘅質素同埋學生嘅成績，好高興中文大學工程學院院長任教授出席，教授應為我地評核學生嘅方法OK並提出不少嘅意見。開完呢個會嘅recommendations會程上Exam Board批閱，之後學生嘅成績就可以公佈。

如何功力大增？

如來神掌第九式！

漫長嘅暑假已經開始，對於我地做老師係冇乜特別，都係要返工總結一吓，准備一吓下學年嘅教材同收新生；但對於同學就唔同咯，成兩個月悠長假期！當中有d同學要揾暑期工幫補下，都係一個好好嘅體驗，我記得我中學暑假都有去做暑期工，日日喺工廠用支風批上縲絲，過著日日打卡返工機械式嘅生活，加上要去當時好汚漕嘅觀塘返工，雖然好辛苦但我得到兩樣野:一) 賺夠錢買一部電腦幫助我日後的發展，二) 要發誓讀好d書如果唔係就要喺工廠坐line啦！經過呢次體驗，我發覺summer係一個非常好嘅機會令自己功力大增，我記得讀書時有一科microprocessor(即電腦內部運作)，先生點講我都一頭霧水，但其他同學都好似明白，我知道呢科係基礎，攪佢唔掂其他科目就死硬，所以我用左暑假耡d書，結果新學年開學我就脫胎換骨，變咗microprocessor專家！另外，好多大學課程都要做final year project (FYP)，我都唔例外，FYP比重高，做得好可以提高GPA，如果見工或者仲有用，因為FYP做得好就等於你識掌握project management skills，加上砌得，揾到野做嘅機會又高d，所以我又利用暑假去準備我嘅FYP，當其他同學享受緊陽光與海灘，我就去揾資料，set我FYP嘅題目，新學年一開始我己經落手落腳做，其他同學仲為做乜FYP苦惱，我咪咁個project攞A咯！:-)

所以同學們，你地想趁summer增加功力，歡迎返黎School揾我，我可以比d project仔你地做下！記住你地讀AD只有一個暑假，要好好把握機會去練成”萬彿朝宗”呀！

努力！加油！

阿拔與阿ham

我教個科聽日考試啦，今日有兩位同學温書時遇到d問題想約我傾下，可惜我今日超忙，朝早開個超長嘅會，攪到成兩點幾先食晏，跟住約左d舊生番黎喺Studio影相，成六點幾先可以去Lib揾佢地傾吓，阿拔同阿Ham温得都七七、八八，只係有d concept唔清啫，佢地識得問吓嘢，已經成功在望啦！我都提議佢地用下Mindmap去温書，會有效d。其實每年用心黎問書嘅人都係屬少數，問攞貼士就比較多… …真無奈，其實我都想比多d知識學生啫，畢竟生活或工作利用IT都係不可缺小的一環！Anyway, 祝各同學學業進步！個個入到心儀嘅U。

[27 May 09 update]

戰前照

今日阿拔、啊Ham同佢兩位組員再揾我問下ITMA，祝好運！

Optical Fiber Experiment at CUHK光纖實驗在中大

增廣見聞之旅

我教緊班電腦讀二年班嘅同學，其中一個題目係光纖通訊，講左d理論之後，又去咗香港寬頻參觀，睇下一間本地公司點樣利用光纖去提供快速嘅上網服務，我都嫌唔夠，想再比多d嘢佢地，因為佢地好快就畢業，要同人比拼啦。做光纖實驗需要好大嘅投資，一個Lab要成幾千萬架！我地好難可以自己擁有，咁點算？咁就要揾「啊媽」中文大學幫手，佢地個optical comm.研究隊伍好有名氣，香港其他U都唔夠中大勁，我就試吓contact一吓team leader許正德教授，佢非常好人，一口應承咗，仲派出佢三位得意博士生入室弟子照顧我地添！其中Gordon除咗帶我地去實驗室介紹佢地嘅研究工作之外，仲花時間設計咗兩個實驗比我地d同學試吓，加上佢地嘅詳細解釋，學生獲益良多呀，我都學到唔少嘢！真係要衷心多謝許教授同佢三位高足！感謝！

“What is MRI?” presentation

What is MRI?

今日原本會帶班Health Care學生去屯門医院參觀佢地個放射診斷科，乜都好早約好哂，點知突然黎個H1N1，醫院提昇咗流感警告所以唔可以有外人參觀，始終醫院係高危地方，為左減低病毒擴散機會，咁嘅安排係絕對明白，負責人黎先生Mike好好人，佢親身到學校講解乜叫磁力共振造影，同學而家會知道當初點解唔比心機讀吓物理、化學同數呢？物理掌管宇宙一切呀！書到用時方恨少！

Mike佢好有心機，除咗解釋MRI原理之外，仲舉作好多case比同學知道MRI可以diagnose乜，但對於我呢個physiology嘅門外漢就O哂咀(我d醫學常識係由睇House MD “醫神”道得番黎架！哈哈)。每個talk嘅尾聲，我通常都會問下嘉賓佢個行業前景點，啊Mike話香港只有理工可以讀到放射診斷科，畢業後再加上5至7年嘅training先可以對MRI有深入嘅認識，利用佢為病人作出診斷，理工每年只有二十幾位畢業生，但現時HA有差不多三十個放射診斷嘅職位空缺！同學有興趣可以諗吓呢一行喎。問咗啊Mike一d有趣嘅數字: HA總共有十三部MRI，每部要成千幾萬，一個scan要起碼半個鐘所以waiting list好長，每個scan平均成本差不多要一千蚊，瑪麗同威而斯醫院各有兩部(一部1.5T, 一部3T) 。Mike仲送咗d紀念品比同學，同學同我都獲益良多！希望流感快d消失，可以好快去拜訪吓啊Mike，聽講話佢地買緊部新嘅MRI喎！

我是一個小小實驗室技術員

套「架生」

我今個學期教科新嘢，對像係讀一年級Health Care嘅學生，內容係関於IT及Instrumentation的概念，為左d同學，想比d實際經驗佢地，等佢地打穩多d根基，始終理論同實踐係兩回事黎架，同埋Learning by doing呀，所以點樣麻煩我都堅持要攪d「手作仔」，我以前係讀電子工程，但我好耐都冇攞支「烙鐵」焊嘢，今次有機會再聞下松香嘅味啦！我將佢地分咗兩組，中医「米高」老師幫我解釋ECG同設計咗個lab.比佢地玩，要多謝「米高」！睇吓d相都知同學好有興趣上呢堂啦 有嘢玩又學到嘢。

Basic Electronics

ECG

Company Visit – HKBN香港寬頻

香港寬頻，唔駛頭痕

讀書同教書都唔應該閉門做車，所以我盡量都會揾d香港做得好嘅公司，帶同學去見識一吓。香港被稱為亞洲電訊樞紐，我就諗不如去參觀ISP或Data Center，城市電訊其下嘅香港寬頻喺葵涌嘅中心參觀，首先由Justin同Calvin喺會議室講解一下香港寬頻點樣利用Optical Fiber提供穩定及高速嘅Internet服務比用户，最精彩係重温以前CTI到而家嘅電視廣告，可見CTI係一間有活力嘅公司，跟著我地就去參觀Network Operation Center，成個軍事基地咁，佢地7×24咁監控住個網絡，最後我地去咗參觀bbTV，同學都玩得好開心。

每一間公司都知道Branding嘅重要，亦會花好多資源攪好公司嘅形像，其實公司要提昇image，最容易忽略就係The First Contact Point(TFCP)，顧客對你間公司嘅像好多時由TFCP決定，根深蒂固，香港寬頻比我個印象非常好，由初初電郵聯絡到當日嘅安排，負責人Justin同Calvin都非常細心，我地對呢間公司嘅印像自然提高不少，真係要讚吓主席Ricky，我接觸個不少公司，好多時都會佢絕學校參觀，但Ricky明白到社會責任及TFCP的重要性。我留意到佢地辨公室嘅椅都係比一般Office Chair舒適(同昂貴)，周圍環境有d畫點綴一下硬崩崩的設備，亦知道公司安排導師替員工上課，幫佢地完成學位課程，員工做得開心，對客自然開心！但香港有幾多老闆做得到？ATV冇Ricky改革係損失。

“Outliers” 成功方程式

成功與失敗

係英國讀書時，時間比較多，平均每個月都可以讀完一本書，果陣時識左好多作者同名著，例如Edward de Bono, Ian Stewart, Tony Buzan, Dale Carnegie，甚至於土產張五常(賣桔者言)等。外國讀書氣氛真係比香港好好多，好多時你會見到外國人會係地鐵、巴士、火車、等緊人時手上都會攞住本書、報紙睇，香港呢？見得最多咪攞住部PSP、NDS、手機不停地打打打。有人話Internet會取代書本，我覺得Internet資訊雖然多，但始終短期來都取代唔到書本。

做老師嘅，一定要不斷充實自己，(其實任何人都要)，除左為自己之外，老師都有責任比多方面嘅知識學生，所以無論幾忙，都要睇書，補充番d墨水！

我近排睇完呢本”Outliers”，我好喜歡呢個作者Malcolm Gladwell, 佢之前d書我都睇過，例如超熱賣嘅”The Tipping Point”，呢個作者對社會一d現象觀察得好深入，大膽假設，小心求証，讀Sociology嘅同學，要睇吓呢本書。

Malcolm喺呢本書分析成功人仕，發覺好多時要有d獨特嘅外在因素，例如文化、天時、地利(同東方智慧十分相似)，先可以令一個人成功，作者用上大量 case去support 佢個論點，當然個人努力是必要的，作者做左個统計話要成功，如要成功？最低限度要投入一萬小時！作者亦對失敗作研究，得出結論就係七個連串小錯就會做成大錯！你都可以試吓數吓你工作緊嘅機構，最近作出左幾多錯誤的小決定，如果就到七呢個magic number，就要快d另找出路啦！哈，最近香港連番失誤有冇七次呢…

提一提，呢本書中譯版都出咗。

中譯版：異數

身教、心教 Teaching by example

記得睇過個survey講邊個職業最受一般大眾尊敬，雖然話職業無分貴賤，但普羅市民都會排醫生、護士、消防員喺好高位置，年年結果都差唔多，教師呢個職業排位都好高，因為教師可以影嚮其他人嘅一身，所以社會對教師有期望係應該，對老師嘅道德標準亦會相對提高。有時我聽到一d老師講d學生點樣唔好，我會諗吓老師有冇以身作則呢？有冇立一個好榜樣比佢地睇呢？所以我絕對相信「身教」。管理學都有講 “Leading by Example” 啦，又或者中国人講「上樑不正下樑歪」，老師就係上樑啦，所以下次老師話學生乜乜時，老師你諗下如果你喺相同情況、環境下你有冇做出同樣行為呢？互勉之。

Do as I say!

Computer Networks Lab.

網絡實驗室

我吔Computing個program有一科Networking，課程內容交比我地時係好理論化，為左學生嘅前途，我地決定加入一d實用原素，但係選乜嘢網絡設備做實驗呢？當然首選業界大佬「思科」嘅產品啦，貴就貴d，但係為咗學生前途著想，點都要架啦，希望同學多多利用；亦多謝校方支持。

學生不傻

…學校裏春風化雨的老師 當然很多，但混日子誤人子弟的，也不少，學生們的心水其實很清，誰能教好他們、誰的身上學不到東西，他們心裏明鏡一般。
為人師表，是一個模樣，而學生，就是這個模樣的鏡子。什麼樣的師表，從鏡子裏映出什麼模樣。學生心裏明鏡似的，做老師的，也要明白這個道理。學生不傻，老師若以為可以唬弄學生，那不但傻，還壞。李純恩 AppleDaily News 18Feb09

Quality Assurance – JQRC and PPQ results

質素檢討會

今日喺情人節，一早就入中大參加咗個研討會，內容関於兩個研究，一，我吔去年四月做嘅JQRC大檢，二，PPQ。JQRC喺一批各大院校派出既重量級人馬嚟睇中大UeXB (我地屬於佢地其下一個單位)嘅質素，結果都非常正面，亦提出一d改善嘅意見等。PPQ叫Program Perception Questionnaire，每一位剛從我地畢業嘅學生都要填嘅問卷，問吓佢地對個program嘅想法，等我地可以改善下。

Studio and Workshop

Video Studio and Handcraft Workshop

好多謝校方及東華嘅支持，我哋申請想設立一個Studio同Workshop嘅建議書已經喺上年批咗，經過多方幫忙所有設施已經建成，今日有機會影咗d相。Room 704分兩部份，一半係Workshop，有d簡單嘅機械同工具，可以比產品設計嘅同學做吓嘢，另一半就係一個Green Studio用黎拍嘢，有KinoFlo嘅Cool lights打世界光，用嚟拍d特技制作，綠色係比電腦用嚟退。

Effective Teaching 分享

大家一齊交換教書心得

今日校長主持咗一個工作坊比我哋互相分享一吓教書心得，等大家教書技巧有所提昇。幾好呀，可以互雙偷吓施，遲d會再攪多d喎。

Quality Assurance II 嚴謹的質量保証機制之二

開始Exam Board Meeting前合照

之前個post都講過，我地喺PEC所做都係School level嘅建議，要上Exam Board批先算數。一月二十一號早上就舉行咗08/09學年第一學期嘅Exam Board Meeting，校長係Chairman，各單位都有兩位代表，同學d成績經過呢個會議討論及核準就係final啦。

相信同學現在已經有成績表，一分耕耘一分收獲，成績欠理想嘅同學千祈唔好灰心，review一吓過去一個學期有乜不足之處，例如太懶惰，估住打機…等等，快d戎掉惡習好好努力；成績理想嘅同學要keep住，尋找突破。記住有問題要揾我地傾吓。

Quality Assurance 嚴謹的質量保証機制

Program Exam Committee Meeting

我地學校係對Quality睇得非常重要，呢個亦都係中文大學嘅傳统，冇Quality就冇Quantity啦。

每次考完試之後都會開一個PEC會議去討論考試嘅結果。今朝就啱啱開完PEC，成員有我地、通識科目老師代表、語文科目老師代表及教務處代表，我地會張一d改咗嘅考試卷高、中、低分嘅樣本比我地嘅 External Examiner (中文大學嘅院長及教授) 睇吓評分嘅公平性，佢都覺得今次評分OK，跟著我地就每一個課程及每一個同學逐一去討論一下，特別留意成績差嘅同學，睇吓我地點樣可以幫佢地，例如佢地會唔會有家庭或感情問題等，每一位老師都會比意見關於課程及同學嘅表現，每一個提議都要有所有人同意才可以提交上Exam Board去批核。會上除咗講成績比較弱嘅同學之外，我地都會推薦一d成績達GPA 3.7或以上的同學入President’s List。

同學們好快收到成績單，一分耕耘一分收穫，讀書係沒有運氣成份嘅，如果你冇盡力嘅話，嚟緊個學期就要開Turbo啦，青春有限呀！

ITMA – 多謝捧場！

ITMA總結

光陰似箭，一個學期十五個禮拜好快又過咗去啦，十八号嘅大考作為呢科嘅總結，幾佰份卷我果部份終於KO咗！飲得杯落！

回想起呢科喺我初初返工時要喺好短既時間之內攪出嚟，當時面對好多未知因素，例如電腦室的設備，學生背景及一般IT嘅水平，同埋想用零budget去攪…等，不知不覺個course都run咗幾年，我都不停作出修改，希望學生可以好輕鬆嘅氣氛之下學習，今年我亦加咗幾個新題目，例如資訊保安及Web2.0等。我喺學期中都做過一個簡單調查，同學對呢科都頗滿意，其實睇吓D相片，都可以知道上堂氣氛喺幾好啦 講真我都遇到好多好比心機上堂及認真嘅同學，相信佢地已經向成功嘅目標邁進緊！

當然我會繼續改進呢個科目，盡量做到最好！同學們歡迎您的意見！

PS: 網絡上有好多有心人仕花咗好多心機寫咗好多高質數嘅Freeware或open source software，做福社會，ITMA亦因此得益，同學亦因此得益，所比我要向呢d無私嘅程式員致敬！

PPS: 上堂都遇到好多騎呢嘢，學堂真喺社會嘅小縮影，真喺乜人都有㗎。就算考試都喺架…可能我太out啦。

Silicone Molding

喺Product Design Studio果科，高Sir又整左D嘢比班Year 2產品嘅同學玩，今次佢地喺玩用矽膠倒模。睇番d相都覺得有少少恐佈，咁可愛既公仔被虐待…

我要「頂」！

頂得最多書者勝!

做個成功嘅產品設計師需要無限創意是必然的，另一樣更重要嘅就喺點樣喺有限嘅資源下去提出一個完滿嘅解決問題方案去佔領市塲。資源可以包括人力、時間、金錢。

呢堂Product Deisgn Concept and Application (PDCA)， 我就參照咗一個喺工程科頗流行嘅Project去挑戰我地Year 1嘅Product Design學生，詳情:

每人分發3張咭紙及12粒釘書機釘，在2小時內要砌一個最高及可以承托最多書本嘅結構。結果係幾出人意表~原來唔洗搞咁多野,簡簡單單兩至三條柱就可以乘托好多書!

我一路觀察D同學點樣去解決問題，有計劃及觀察力強既同學通常會做得比較好。呢兩樣嘢亦都係今次呢個Project想帶出嘅信息之一。呢一堂D同學都玩得好開心，等我得閒再諗多D有益又考腦筋嘅習作挑戰吓佢地先。

PS 我自己之後用咗半個鐘都做咗個，當然喺勁過哂佢地個D啦 ！！

“M” 型學堂?

我成日去星際果間專賣內地書籍的書店逛吓，貪內地書平又好快有新書。

最近買咗幾本大前研一嘅著作，其中最出名我又閱讀過的有「M型社會」、「即戰力: 如何成為世界通用的人才」…等。喺「M型社會」本書，大前發現日本社會開始走向兩個極端:富裕及貧窮，中產階級開始由社會支柱变為小數的一群。两、三年前有人講香港都有步向”M”型的趨勢。大前比人稱為「趨勢大師」、「策略先生」、「管埋大師」…等。 佢07年受貿發局邀請到香港講talk，一小時嘅talk嘅酬金好似話要幾十萬(大師即喺大師)，佢提出香港和澳門應該結盟(當時主流意見喺香港應該與珠三角結盟)。當然以澳門今日嘅情況嚟，呢個諗法可能要再修改啦。

我點解要提出大前呢個概念呢？因為我觀察到呢幾年我教既學生們都有走向”M”型的趨勢:學生唔喺好勁就喺好水，中間成績D學生就愈來愈少。喺我讀書嘅時代，學生的成績喺Bell shape的。

呢個觀察是否普遍呢？如果喺，我哋教學及行政上應該作出點樣既修改去配合呢？

同學們，如果只有两個極端，我相信你一定會話揀成績好的一端，問題喺：你今日做咗D乜嘢去達到呢個目標呢？

ITMA Q&A Session

温習時間又到啦！

日期:16 Dec 2008

時間: 14:00-15:00

地點: Room 1005 (座位有限)

自由參加，但出席前請記住:

1. 千祈咪問我有冇貼士，我唔係馬評人。其實你有留心上我每一堂，都應該知道重點在那裡。
2. 請先温書一遍，看有什麽不明白才問我，否則會浪費大家的時間。
3. 試題分佈平均，不會偏側于某一方的。
4. 考試型式分三部份，少量MC，有Short and Long Questions。
5. 全英語作答，請帶香港考試局認可計算機。

Sketching

繼上次Foam Cutting 後，今次Product Design Concept and Application (PDCA) 又有新搞作 ─ Sketching。 呢次既focus 放喺基本既Sketching 技巧，為佢地之後喺作為一個產品設計師作好準備。

Go sketching!

Integrative Project- proposal presentation

又到呢個Term既重頭戲─ Integrative Project (IP) Proposal Presentation。

同一眾Panel Members入到課室，見到個個西裝骨骨、神色凝重就感受到佢地有幾重視今次既Presentation。由於個concept係由學生主導，所以佢地既意念都幾多元化，由一般家品電器到助行器都有。

IP 可以話係成個Programme 的總結，我地好希望學生可以將呢兩年所學的知識得以靈活運用。Supervisors會同學生定期會面，為學生的意念提出意見 。另外，我地亦好強調佢地可以有效將自己的設計意念表達出來，所以Presentation都會喺IP度佔一定的比重。

Very serious!

OLE: Music Card Workshop

阿Pat剛教咗一班活潑既TKP中學生點樣program microcontroller去做一張自已可以創作音樂既音樂聖誕卡，係呢個佳節，送比屋企人。睇吓D相佢地enjoy得黎又學到嘢喎！並要多謝一班我地熱心嘅year 1及2嘅同學返嚟幫手做helper！唔該哂！

OLE (Other Learning Experience) Workshop喺我地school攪嘅一系列活動之一，目的喺想比中學生一D課本以外有用的知識。

自我創作音樂卡工作坊

摸黑晒板記(PCB Making)

學整PCB印刷綫路版

11月一個寂靜的晚上，一大班3D Product Design Year 2學生摸黑去7/F 的Studio …似有圖謀….我當然要查探究竟….

原來佢地同埋高Sir去Studio “晒板”!!!!所謂晒板…其實就係電路板製作, 由於製作過程中的某些工序係要避免曝光，所以佢地要摸黑進行，亦因為咁，呢幾日Studio都貼左個”非請勿進 晒板中” 的告示了。

呢個Project都幾有用，因為而家做產品設計都離唔開電子零件，認識吓PCB製作喺好嘅。不過見佢地第一次揸”辣雞”(烙鐵)真喺O哂咀！我都過咗幾招比佢地，因為我個undergrad喺EE架！寶刀未老:-P。

Foam Cutting – 22 / 29 Oct 2008

Product Design Concept and Application (PDCA)既學生呢兩堂要造Prototype, 每個人都要落手落腳整自己的 Foam Model。首先每人會分發一個高密度發泡膠(圖中藍色物體)，然後要根據實物，用發熱線及cutter將個foam 批到與實物相似。呢幾堂都係由我地第一屆的畢業生Ivan客串。對於可以親力親為做件成品出嚟, 班同學都好雀躍、好比心机去做。遲吓post 佢吔D作品出嚟比大家睇吓。

其實呢個Course本身係想俾佢地對產品設計有個基本的認識，可算係成個Programme (AD in 3D & Product Design)嘅入門course，之後仲會有hand sketching堂潻，呢D都喺做一個product designer嘅基本功。希望佢地之後都會繼續咁投入，比心机段鍊好D基本功!