Merry X’mas and a Happy New Year 2010!

夢想成真！

真係又到聖誕！今年都無驚無險又過一年，工作沒有減少過，可能正所謂 “No pain no gain” 嘛！預計未來工作環境將會有好大嘅改變，又或者所謂「變幻原是永恆」嘛！都要積極面對。家庭方面亦有好大改變，需要更多嘅精神去承擔更多責任。

在X’mas Eve送上一些祝福：身體健康、新年進步！同事們事業順利、工作中嘅畢業生事業蒸蒸日上、正求學嘅畢業生學業順利，得閒返嚟傾吓、朋友們事事順利、家人一切安康；最後比我d學生：一年又過去、不要浪費青春，失敗唔緊要，最緊要學到嘢唔會再錯第二次。

薪火相傳 – Quick Sketching Workshop

Quick sketching!

有留意我地個學院消息嘅同學相信對Ivan都唔會陌生，佢係我地第一屆Product Design畢業生，呢兩個禮拜返黎教Year 1學生Quick Sketching，又教用Marker上色，呢d技術對 Product Design 係基本功，希望同學上完呢兩堂要時時刻刻練習一吓，畫功唔係一朝一夕就會好。Ivan仲帶咗佢公司最新嘅USB Hub 同的色 Speaker 仔獎勵兩位畫得比較好的同學，結果由「莊臣」及「卡門」奪得，比心機。

薪火相傳 – Solidworks Workshop

Solidworks 工作坊

分享知識、道理係美德，雖然我做教師大多數時間都是”give”，其實我都有”take”，班上有幾十人就有幾十種不同嘅性格，同咁多人喺短短幾十小時磨合十分唔簡單，同一內容、表達方式，放在唔同班裡面可以有天與地的差別，呢個係挑戰！

學生喺我地個 School 短短兩年，點樣可以令佢地有一身好功夫，應付升學或就業的需要？當然教佢地多d野就最好，但係對於我地蚊型school咁小資源，點做呢，真費思量！好彩我地有一班好好嘅畢業生，佢地雖然離開咗，但係仲關心我地同d師弟妹，好似今日咁，阿 Chapman (我地 Product Design AD剛畢業) 就番黎同d一年級產品設計學生講下 Solidworks 的用法，等佢地快d上手，畢竟 Solidworks 就係 Product Design 嘅左右手！Year 1 學生差不多有六、七成出席率（算係咁架，而家話免費有野學都好難會吸引到學生黎） 。雖然短短兩個星期五嘅幾個鐘，我相信 Chapman 從教學中都學到唔少嘢，三嬴局面，like, very like, very very like！Thanks Chapman!

由緣份到IT前景

年紀愈大愈發覺有好多嘢都係命中註定、要發生始終要發生或者係計劃周詳但意料之外，呢d可以講係命運、緣份。

記得我喺三月通過我朋友嘅朋友揾咗個機會上電台介紹我地個School比多d人識(你知我地細單位，推廣budget是零，咪要靠朋友咯)，機緣巧合，其中一位嘉賓主持Horace係搞online娛樂，佢當時想揾IT人，叫我介紹d好同學比佢，我諗起我地第一屆畢業生Jeremy，佢今年應該結束中大兩年生活，畢業啦，要投入社會工作…結果佢已經喺呢間公司做咗差不多一個月，今日Jeremy、佢嘅上司Andrew同Horace約左我出黎食lunch，大家傾下天南地北、IT前景，佢地都話IT難請人，Jeremy話今屆佢d同學好多都有多個一個job offer，比起讀商科同學情況好好多！Andrew話佢嘅IT Team要expand到50人，乜position嘅人都要！仲問我有冇好嘅學生介紹一下，所以同學仔如你有興趣，請儘快聯絡我！佢地都話IT前景唔係差，只不過係d同學成日道聽途說，家長有時亦唔係太了解，其實無論邊個field，你只要做到最top個d人之一，咁就唔驚被人淘汰啦！

所以咪話呢d就係緣份囉！   遲d我會上佢地去司睇下、訪問下佢地老闆，到時影番d相放係呢道啦！

羽翼豐滿

It's not about the food...

富啓發性的書

今日滂沱大雨雷電交加之中去咗尖沙咀同一班應屆3D Product Design嘅畢業生食buffet lunch，仲有其他老師包括高Sir。同學當中有d人會喺香港嘅大學繼續昇學，有d會去外國浸咸水，有人會投入社會大學，無論點樣，希望你地能夠學以致用，盡一切能力去應付將來嘅挑戰，做個對社會有貢獻嘅人，School嘅大門為你地長開，有乜可以幫到手嘅話，隨時歡迎揾我地。佢地好有心請我地食lunch謝師咁話, 我就每人送一本勵志書比佢地睇，”The Last Lecture” 「最後的演講」 希望佢地睇完有所啓發。

Contribute back to the Alma Mater – 回饋母校

第二屆CA人

暑假開始啦，唔好以為D學生走鬼哂，有好多畢業生返黎探我吔，我地喺暑假都有好多野做，想要d人幫下手，我地咁細嘅school，點會有多budget請temp呀….苦惱之際，d舊生話趁得閒不如返黎幫手，又可以學吓嘢，佢地話冇酬勞都冇所謂，真係感動，當社會成日批評而家d年青人太市儈，但我覺得千祈唔好generalize佢地，好似相中人阿Pat咁，佢喺我地道讀完Creative Animation，而家黎緊degree最後一年，佢返黎幫我地edit番我地以前拍落嘅活動video、設計下我地ITDD嘅宣傳資料等，Pat係一個勤力、有禮、有責任心及上進心嘅後生仔(佢而家仲係single)，多d呢類學生，我地就會輕鬆d啦，呢個係每一位老師嘅願望。無論有幾惡劣嘅辦公室政治，只要見返呢d學生，見到佢地成長、思想漸成熟，什麼攪C棍、低B人、曱甴等都唔再重要啦！:-)   希望我地ITDD繼續培養一d有為學生，呢個先至係老師最應做嘅嘢！

默默地工作

展板設計

一年一度嘅開放日又開始啦，今年學生事務處邀請左我地ITDD嘅學生設計咗3塊展板，雖然每塊板得果五十蚊budget同埋幾日嘅時間，同學都好認真花唔少心機去做，唔好以為好易做呀，我都幫左手個幾鐘，每個圖都係用雙手逐塊剪出黎逐塊貼上去！其實有好多人都唔知我地school嘅學生係學校忠實粉絲，有乜要support都會見到我地school嘅學生積極參如，不過可能因為我地ITDD嘅學生特質係做背後的女人，不計籌勞，所以無乜人知啫！今次我就要影d相去表揚下佢地！Well done！

PS: 提議下次再做d咁嘅嘢之前揾我傾下先，我應該有d方法去做快d。

大家庭

茶敍

時間過得好快，第一屆ITDD School嘅畢業生都大學畢業啦，其中之一就係Jeremy, 佢今日返黎揾我飲茶，佢話Final Year Project攞咗A，有一科B，所以應該都會喺全班嘅頭果三分一，可能你喺其他場合聽過我介紹過Jeremy，佢係一個好有計劃嘅人，當而家大學生話難揾工，又話IT難揾工，Jeremy已經見左幾份工(包括我間接介紹果份)，有d都offer咗，所以話市場永遠需要有能力嘅人，那怕你讀邊一個field，佢今日揾我飲茶順便問下我一d事業發展嘅意見。今日好熱鬧，仲有遲Jeremy一屆讀3D Product Design嘅James同Cmei番黎，James畢業都有中文大學同英國嘅Northumbria U收佢讀degree，佢選擇左去英國，趁暑假返香港探下家人，今日同Cmei返黎揾我食晏，Northumbria Product Design出左個勁人叫”Johnathan Ive”，你Google下就知佢有幾勁，James可以做佢師弟都好啊。Cmei同James係同一屆同學，Cmei畢業就有中文大學比左Year 2 direct entry個offer佢，佢係中大讀得好開心，仲有一年就畢業囉。我同James同Cmei傾吓有冇辨法將佢地喺我地Schoool畢業Project個ideas生產出黎，東華總理可能會support。

你好嘢(2)！

努力的成果

讀我地Computing嘅蕃茄同學都有HKU嘅cond. offer，蕃茄係一個努力及學習認真嘅同學，今天終於修成正果啦！HKU封信話今年有八千幾人報，你同阿麟都被取錄，証明咗你地嘅實力，恭喜，恭喜！比心機考埋呢個試，始終要有3.4先落實，不過我諗你地應該冇問題。

讀大學係人生一個好重要嘅理程埤，係認識自己一個好重要嘅階段，除咗要吸收知識之外，做人處事都要學習，大學係過渡社會大學嘅一道橋樑，盡量認識多d讀不同科目嘅同學，擴闊自己嘅眼光同社交圈子，我好多best fds都係讀大學識嘅，仲有仲有，如果遇到投緣嘅異性，要嘗試發展下，唔好話一定要做情侶咁…呢方面唔明可以請教下我呀 hehe

你好嘢！

流感麟，比心機！

呢排同學除咗忙考試之外就係忙去各大學面試，我地IT School前排四月開始都有同學開始收到通知去面試或直接取錄，我地已經有好幾位同學同時被兩間大學取錄咗！証明我地School嘅學生係好competitive架！

好似阿麟咁，佢係我地School一年級Computing學生，因為成績好，未畢業PolyU同HKU都收佢讀Degree，佢考慮緊揀邊間，如果你係佢你會揀邊間呢？

一年級嘅同學要比心機啊！阿麟，事實証明一次小小嘅失手唔代表d乜，人生漫漫長路，只要珍惜機會，認識自己嘅弱點，不斷改進！仲有唔好太驕傲，一山還有一山高呀(記得你最低要有3.4先可以入HKU)！仲有，要同阿”茄”互相照顧，佢比較多愁善感，成個詩人咁(佢可能寫”C”會好掂！)。得閒番黎探下我地，IT School大門隨時為你而開！ 祝考試順利。

High Flyers!

c.u.t.w.

今日幫PR影咗d學生相，呢d學生都係比大學取錄咗，有d同學會直入二年級，一分耕耘一分收獲，祝你地發光發熱，為社會作出貢獻！

小插曲：PR預備左部D80同支灯比我用，我見鏡頭好唔乾淨，用眼鏡布抹下，點知成塊鏡飛左出黎，邊個之前個死仔用殘咗唔出声！公家嘢都要愛惜麻，真不該 攪到我要用DC仔影，唔講唔覺哩！技術搭夠麻！

千手觀音?

Looking confident!

High Table Dinner at CUHK

隆重的晚宴

4月30號晚，我地攪咗個「高桌聚餐」，地點係景色怡人嘅中大Guest House, 如果你唔係中大職員係唔可以入去架！所以同學被邀請喺道食飯係榮幸，你睇d相就知佢地幾雀躍啦。餐廳風景唔錯，府瞰成個吐露港，喺中大讀緊嘅舊生同我地聚舊並勉勵現在讀緊嘅同學，仲有嘉賓伍達倫博士講吓佢點樣進修6個碩士學位添。

Company Visit – HKBN香港寬頻

香港寬頻，唔駛頭痕

讀書同教書都唔應該閉門做車，所以我盡量都會揾d香港做得好嘅公司，帶同學去見識一吓。香港被稱為亞洲電訊樞紐，我就諗不如去參觀ISP或Data Center，城市電訊其下嘅香港寬頻喺葵涌嘅中心參觀，首先由Justin同Calvin喺會議室講解一下香港寬頻點樣利用Optical Fiber提供穩定及高速嘅Internet服務比用户，最精彩係重温以前CTI到而家嘅電視廣告，可見CTI係一間有活力嘅公司，跟著我地就去參觀Network Operation Center，成個軍事基地咁，佢地7×24咁監控住個網絡，最後我地去咗參觀bbTV，同學都玩得好開心。

每一間公司都知道Branding嘅重要，亦會花好多資源攪好公司嘅形像，其實公司要提昇image，最容易忽略就係The First Contact Point(TFCP)，顧客對你間公司嘅像好多時由TFCP決定，根深蒂固，香港寬頻比我個印象非常好，由初初電郵聯絡到當日嘅安排，負責人Justin同Calvin都非常細心，我地對呢間公司嘅印像自然提高不少，真係要讚吓主席Ricky，我接觸個不少公司，好多時都會佢絕學校參觀，但Ricky明白到社會責任及TFCP的重要性。我留意到佢地辨公室嘅椅都係比一般Office Chair舒適(同昂貴)，周圍環境有d畫點綴一下硬崩崩的設備，亦知道公司安排導師替員工上課，幫佢地完成學位課程，員工做得開心，對客自然開心！但香港有幾多老闆做得到？ATV冇Ricky改革係損失。

Northern Puff!

好飽呀！

「寶兒」同學今朝由佢屋企帶左d北區特產比我地試吓！好大個，好多cream呀！yummy！多謝呀！

分甘同味呀！

東華三院春茗

春茗

今晚有幸被邀請出席東華嘅春茗，開完AB之後就即刻飛的去，雖然酒樓近屋企但攪到無時間換番件formal嘅衫。今晚係第一次去東華嘅春茗，有成百幾席，人強馬壯。當晚有好多節目，啤酒競飲、KTV大賽同壓軸大抽獎。KTV勝出嘅都係社工們，佢地好玩得；總理們好慷慨咁捐咗好多禮物出嚟抽獎，最後因為氣氛太好，幾位總理每人再捐三千大圓做大獎呀！

爛Gag王大賽頒獎

4GB手指頒贈給爛Gag王

恭喜陸思嘉同學，佢個gag經過投票之後同學認為係至爛，啊Pat代表我地School頒贈名貴4GB手指比陸同學。

重温一下陸同學個gag:

點樣可以唔駛俾學生証都入到CUTW？就係講“我黎自德誠”。

聚舊

舊同事聚舊

自己一向嘅管理方法係當同事好似朋友、家庭成員咁，畢竟同同事相處嘅時間分分鐘長過屋企人。可能因為咁，我同好多舊同事得閒就聚吓舊，今晚就同Kathy同JimJim食晚飯聚舊啦，Kathy而家係科大做得幾開心，JimJim喺馬會做IT Architect；佢地嘅離開當然可惜亦係損失，但係睇到佢地有更好嘅發展係好高興。而家我有Facebook，更加方便聯絡啦。

新春團拜

東華三院新春團拜

今日午時就去咗上環總部參加團拜儀式，今年係我第二年參加呢個咁莊重嘅活動，上年冇帶相機，今年就有啦，因為個禮堂好莊重，好有氣派，其實東華已經有一百三十多年的曆史啦，有幸被邀請，一定要把握機會用科技紀錄一下嘛。在塲有好多紀者，主席馬清鏗致賀年詞之後，幾位董事局成員就開始切燒豬儀式，好似話拜過神嘅燒豬係要食吓，我都搶咗幾舊！:-) 不過掛著影相同食燒豬，冇攞到開工利是啊！:-(

睇到禮堂有好多牌扁同對聯，其中有四個字覺得好有意思: 「善與人同」，網上解釋:

舍己從人，樂取於人以為善，把自己原有的立場與做法放棄，取他人所有的特質來成就善行，而這就是君子對他人所應有的責任。

Quality Assurance II 嚴謹的質量保証機制之二

開始Exam Board Meeting前合照

之前個post都講過，我地喺PEC所做都係School level嘅建議，要上Exam Board批先算數。一月二十一號早上就舉行咗08/09學年第一學期嘅Exam Board Meeting，校長係Chairman，各單位都有兩位代表，同學d成績經過呢個會議討論及核準就係final啦。

相信同學現在已經有成績表，一分耕耘一分收獲，成績欠理想嘅同學千祈唔好灰心，review一吓過去一個學期有乜不足之處，例如太懶惰，估住打機…等等，快d戎掉惡習好好努力；成績理想嘅同學要keep住，尋找突破。記住有問題要揾我地傾吓。

Quality Assurance 嚴謹的質量保証機制

Program Exam Committee Meeting

我地學校係對Quality睇得非常重要，呢個亦都係中文大學嘅傳统，冇Quality就冇Quantity啦。

每次考完試之後都會開一個PEC會議去討論考試嘅結果。今朝就啱啱開完PEC，成員有我地、通識科目老師代表、語文科目老師代表及教務處代表，我地會張一d改咗嘅考試卷高、中、低分嘅樣本比我地嘅 External Examiner (中文大學嘅院長及教授) 睇吓評分嘅公平性，佢都覺得今次評分OK，跟著我地就每一個課程及每一個同學逐一去討論一下，特別留意成績差嘅同學，睇吓我地點樣可以幫佢地，例如佢地會唔會有家庭或感情問題等，每一位老師都會比意見關於課程及同學嘅表現，每一個提議都要有所有人同意才可以提交上Exam Board去批核。會上除咗講成績比較弱嘅同學之外，我地都會推薦一d成績達GPA 3.7或以上的同學入President’s List。

同學們好快收到成績單，一分耕耘一分收穫，讀書係沒有運氣成份嘅，如果你冇盡力嘅話，嚟緊個學期就要開Turbo啦，青春有限呀！

星級導師 星級學生

Good Students - Good Teacher

我地其中一位極受歡迎嘅星級老師啊Pat趁就快大考，同D同學輕鬆一下，於是邀請佢地上嚟十樓影吓相，並且許個願。啊Pat話祝所有PAD同學學業進步，考試順利。

Merry Christmas to all our stakeholders!

Season’s Greetings

Ho Ho Ho!

This season’s greetings is for the happiest of all holidays to you.

This is a good opportunity to thank you for giving comments on our programme for improvements.

We wish you and your family all the joys of a great Christmas Season, and the very best for the coming Near Year!

With warm wishes from the School of IT and Digital Design.

Dec 2008

聖誕快樂！我地School想同各位學生,家長, 老師講聲Merry Christmas!!感謝你地為學生勞心勞力!另外, 亦都想多謝所有幫助過我吔嘅朋友及同事~以及收左我地畢業生嘅各方院校,多謝你地俾佢地機會去繼續進修,為踏入社會做足準備! 在此希望你地有一個開開心心的聖誕節及新年!!

(我已寄出好多封有我親筆簽名嘅聖誕卡，因環保關係，只能寄出有限數量，請見諒！但無論是紙卡或電子化，都是同樣衷心的)

我得咗啦！

同事阿Pat喺昨天正式擺咗佢既畢業証書啦！我地見到佢要講声”恭喜哂，Dr. Chan！“

同學仔要以佢做榜樣，希望你地將來有呢一日，到時要邀請我地參加你地嘅畢業禮啊！

要正式稱乎阿Pat Dr. Chan啦