School Talk – 東華三院 黃笏南中學

黄笏南中學昇學講座

好快又一個新學年，另一批學生將會面對兩個公開試。今年我地比往年早去東華網絡講Talk，今日下午我地一班人，包括PR、士提芬劉、Wing蔡同我就去咗九龍塘黄笏南中學介紹我地比佢地認識，佢地由於係東華大家庭，成功取錄會有一萬(PAD)或二萬(AD)大元獎助學金！而家讀書讀得好，真係好多途徑有資助。我都講咗我Facebook佢地知，方便日後查詢昇學事誼。

多謝黃笏南薜老師安排。

Further Studies Offers 07-09 大學取錄學額统計

暑假呢個break最好要黎做總結同埋計劃吓下一學年嘅嘢。我地三年平均黎講有大概有四成學生選揀繼續升學，同埋好多Year 1同學都想知d師兄、姐有乜大學比offer又或者去咗邊道讀degree，做咗07至09年嘅统計，又用咗個圖黎表述。個base加起黎係大個100%因為有d同學同時有兩、三間大學offer。為左美觀，只列出一部分嘅offer。

七大升學地點

(資料不斷更生中，圖表只作參考，每年大學收生情况會不同)

香港教育的殘酷!

香港中學生要入大學要經過幾多関卡，予其睇數字，我用圖畫表達出嚟做參考，仲易明啦！我用左09年嘅數據黎畫，香港每十個F.5學生，大嘅只有一個先可以讀到政府資助大學嘅課程。新學制334之後，HKCEE同HKALE兩個公開試喺2012年就會消失，比「香港中學文憑考試」代替，加上校本評核，理論上學生會少咗考試壓力。

殘酷一叮！

(根據考試局資料，2009年HKALE有37,905人應考，17,744人考獲入大學最低要求；2009年HKCEE有115,527人應考，考獲符合入讀中六最低成績要求的考生共有58,270名，但中六學額只有29,030個；日校考生於五科(包括中國語文及英國語文科)或以上獲取E級或第2等級以上成績佔59.1%。)

你好嘢(2)！

努力的成果

讀我地Computing嘅蕃茄同學都有HKU嘅cond. offer，蕃茄係一個努力及學習認真嘅同學，今天終於修成正果啦！HKU封信話今年有八千幾人報，你同阿麟都被取錄，証明咗你地嘅實力，恭喜，恭喜！比心機考埋呢個試，始終要有3.4先落實，不過我諗你地應該冇問題。

讀大學係人生一個好重要嘅理程埤，係認識自己一個好重要嘅階段，除咗要吸收知識之外，做人處事都要學習，大學係過渡社會大學嘅一道橋樑，盡量認識多d讀不同科目嘅同學，擴闊自己嘅眼光同社交圈子，我好多best fds都係讀大學識嘅，仲有仲有，如果遇到投緣嘅異性，要嘗試發展下，唔好話一定要做情侶咁…呢方面唔明可以請教下我呀 hehe

你好嘢！

流感麟，比心機！

呢排同學除咗忙考試之外就係忙去各大學面試，我地IT School前排四月開始都有同學開始收到通知去面試或直接取錄，我地已經有好幾位同學同時被兩間大學取錄咗！証明我地School嘅學生係好competitive架！

好似阿麟咁，佢係我地School一年級Computing學生，因為成績好，未畢業PolyU同HKU都收佢讀Degree，佢考慮緊揀邊間，如果你係佢你會揀邊間呢？

一年級嘅同學要比心機啊！阿麟，事實証明一次小小嘅失手唔代表d乜，人生漫漫長路，只要珍惜機會，認識自己嘅弱點，不斷改進！仲有唔好太驕傲，一山還有一山高呀(記得你最低要有3.4先可以入HKU)！仲有，要同阿”茄”互相照顧，佢比較多愁善感，成個詩人咁(佢可能寫”C”會好掂！)。得閒番黎探下我地，IT School大門隨時為你而開！ 祝考試順利。

Where do our graduates go? 師兄姐的升學去向？

開枝散葉

每個學年完結前都會做個簡單统計，睇吓我地個School畢業生昇學去向，以往都係用個Excel去顯示出黎，一堆數字，比較沉悶，我地攪design架嗎，梗係要用graphic表示下啦，寶兒同學諗左用棵大樹，幾好呀。

睇番我地短短兩年歷史，有唔少有心機讀書嘅同學都可以繼讀升上大學，本地八間大學都有我地SITDD嘅學生就讀緊 ，佢地分佈於理(包括工程)、文、商、醫不同學院，証明我地school嘅課程夠廣闊，升學範疇及途踁多，我地有部份同學同時有2-3間大學比offer佢地添！！仲有由我地school去中大讀嘅學生今年暑假就學士畢業啦，好期待同佢地係中大個電飯煲前面影畢業相！

喺之前舉辨嘅3-3-4研討會結束之後，有幾位家長同我傾左好耐，雖然佢地嘅小朋友都係初中階段但係幾位媽咪都開始幫小朋友計劃昇學，佢地都想向資訊科技IT發展，因為一來小朋友有興趣，二來佢地覺得IT係未來社會不可缺少的元素，就好似電力同自來水一樣，我同意，你睇吓互聯網點樣改我地嘅生活習慣，如果而家Facebook話收擋，你估會唔會引起暴動？有人估計Facebook市值大概3.7億美元，創辦人阿Mark現年只係25歲！一個小小聯絡感情嘅電腦程式就值咁多錢同埋影嚮咗全地球2億人/用户! 我相信資訊科技會係未來十年(或更長)經濟火車頭之一。

理、文、商、醫

媽咪們仲有一個諗法，當普遍家長認為仔女一定要讀商科，佢地就認為應該要陪養子女對科技嘅及創作興趣，原因一:科技推動人類、社會發展，原因二:理科係一科專業，若要轉去商係好易，例如讀個MBA(或累積實際經驗)，但由商轉理科或工程科就難好多咯，加上好多理、工科課程都已經有商業課目選修，咁我又問財務同會計學咁吃香，點解又唔鼓勵佢地向呢方面發展呢？佢地話呢兩科可以通過短期課程同考專業公開試入行，況且做財務嘅好多都係工程或理科畢業，因為佢地d數學底子好。呢幾位真係非一般嘅家長，當人人都買股票，佢地就一定係cash in離場果批人攞，言談中佢地強調好多次要以仔女嘅興趣為第一！真係心水清同開明嘅家長。

Optical Fiber Experiment at CUHK光纖實驗在中大

增廣見聞之旅

我教緊班電腦讀二年班嘅同學，其中一個題目係光纖通訊，講左d理論之後，又去咗香港寬頻參觀，睇下一間本地公司點樣利用光纖去提供快速嘅上網服務，我都嫌唔夠，想再比多d嘢佢地，因為佢地好快就畢業，要同人比拼啦。做光纖實驗需要好大嘅投資，一個Lab要成幾千萬架！我地好難可以自己擁有，咁點算？咁就要揾「啊媽」中文大學幫手，佢地個optical comm.研究隊伍好有名氣，香港其他U都唔夠中大勁，我就試吓contact一吓team leader許正德教授，佢非常好人，一口應承咗，仲派出佢三位得意博士生入室弟子照顧我地添！其中Gordon除咗帶我地去實驗室介紹佢地嘅研究工作之外，仲花時間設計咗兩個實驗比我地d同學試吓，加上佢地嘅詳細解釋，學生獲益良多呀，我都學到唔少嘢！真係要衷心多謝許教授同佢三位高足！感謝！

資訊革命 – 以小擊大

資訊科技徹頭徹尾咁改變我地嘅生活，你諗下今時今日冇左手機、互聯網、Facebook 會點？互聯網呢樣嘢可以話”level the playing field”，將世界變得公平一點。舉例，有左Skype，攪到d大電訊商好頭痛，只係一個小小軟件就可以將傳统電訊生態環境作翻天覆地嘅改變，唔好以為呢個係舊文，最近Skype落左iPhone到，歐洲有d電訊公司(Deutsche Telekom)就禁止iPhone用户用Skype(哈)。Skype其實係由兩個人係2003攪出黎，呢兩個北歐人(Niklas Zennström and Janus Friis)係P2P世界都出咗名，KaZaA (記得嗎？)都係佢地攪出黎，喺2005年，eBay用US$2.6 billion 買咗Skype。之後仲有好多例子，上我堂講Web 2.0時你都聽過d啦，好似楊志遠同David Filo攪嘅Yahoo攪到Microsoft腳震，之後兩個人Sergey Brin & Larry Page成立Goggle又攪到Yahoo同Microsoft冇得訓… 所以話你只需要識寫程式，加上一個新點子，都可以隨時重演「大偉和巨人」的故事。

會擊敗Facebook嗎？

今日又睇到一篇「大偉和巨人」的故事，你以為Facebook係Market leader, 無得同佢鬥？有間香港公司就針對Facebook嘅弱點:私隱，同iPhone用户，寫左個叫Thumbdive嘅平台, 聽講private beta反應不錯, 期待6月正式推出公眾試用版！一間同香港有関嘅科技公司，值得驕傲同支持。

希望讀緊IT, Computing嘅學生讀完以上故事有d啓發，一部電腦、編程技巧加上一個點子，就有機會改變生活、打倒巨人！！好好咁打好基本工啦！有意加入IT嘅同學亦可以睇下呢d成功例子。

Choosing your AD programme? 點揀AD課程？

打救衆生

學生常常遇到選科嘅問題，最近有PAD同學都感到好困惑，不如等我分析一下。

你揀得副學士讀，估計你都係想跟著讀大學，入大學都要講策略，最非你係浪漫主義者，唔計較。由AD點樣駁去讀個本地大學學位呢？有以下少少真實個案分享一下：

首先你一定要對果個area有興趣，但係興趣唔係大哂，我見過一個讀其他學院嘅同學阿”K”，佢對一個area好有興趣但係耐何阿”K”佢自已讀極都唔掂，成績唔好，上大學機會都麻麻，碰啱佢個科嘢比較學術性，無個degree係冇乜發圍，揸住個咁學術性嘅AD又對揾工無乜用。同學要記住如果你報non-jupas 入本地政府資助大學讀year 1或2，你係用你AD year 1嘅 term 1+2 嘅cGPA成績去報，如果你PAD個底係弱嘅，現實d講，你估喺AD短短兩個學期你可吾可以脫胎換骨、成績突飛猛進呢？

如果你認為你可以攞到cGPA>3.7，咁你可以依你興趣，挑戰一d熱門科目，你可以去Jupas睇吓各大學上一年收生要求而推斷一下今年邊科會大熱，成日大熱既科目有機會唔收Year 2插班，甚至唔收Year 1 non-Jupas入添，就算收都要過五関斬六將，例如成績要cGPA3.8或3.9、有靚靚profile、勁人嘅推薦信加面試！點樣攞到cGPA >3.7？基本上你要科科攞A！！你有冇信心AD第一年所有科目攞A呢？

假如你嘅信心只係可以到cGPA3.0左右 (3.0左右係入Local 大學不明文嘅入場卷)，入最熱門嘅科目嘅機會就低d啦 ，咁係咪冇計呢？又舉個例子，我地School有位 “J”同學佢對IT同商業都好有興趣，佢亦知道入純商業科在當時嚟講係競爭非常劇烈，你唔好以為佢成績差喎，佢有3.7架，同埋佢都好talk得，啊J諗法係就算比佢入到去都要挑燈夜讀先可以有機會喺top果3份1人裡面，分分鐘要曦牲哂所有社交時間添，”J”覺得大學生活讀書係非常重要，但亦應該要有正常社交活，因為僱主請人都要睇社交、溝通能力，所以佢揀咗中大SEEM讀，直入year 2，SEEM 有3個同商業有關嘅stream: Business Info. System, Financial Engineering  同Logistic & Supply Chain Management，三個streams揀一個總共六科，佢而家嘅成績有望攞第一(1st Hon.)！佢仲有時間參與學生活動，識左好多朋友！呢個策略絕對可以參考！仲有中文大學工程學院收non-Jupas 入讀都算係第一、二多架。

如果你信心只可以攞到cGPA2.0，你嘅選擇就多數係就業，讀書就只能揀一d排名比較低d嘅大學、Top-up degree 或者公開大學 (有d Top-up或公大嘅課程收生要求都高架)。如果你都諗住就業嘅話，你揀AD嘅課程就要揀d有實用性，可以令你有一技傍身，唔好揀d太學術性！我吔有位讀產品設計嘅 “I” 同學，畢業成績都好好，可以入本地大學，但”I”決定出黎創業，成立咗一間產品設計公司，做合伙人，佢嘅產品而家係歐洲同亞洲都有得賣！

(以上資料僅作參考用途，每一位同學背景不同，每年大學收生情况都會改變)

增值系列 – Talk “Electronic Medical Records”

Net Caves HK

政府最近提議用十億推出電子病歷計劃，到時市民嘅病歷就可以喺各醫療機構之間互通，加快趁証。據估計呢個計劃需要200至300人，當中不少係IT人，呢個係未來一個值得留意嘅發展方向。

最近我接觸過一間本地公司 Net Caves ,佢地默默耕耘寫咗一個叫 WinMed 嘅軟件比醫務所用，因為香港好多醫務所都其實係小型企業，呢個軟件提供自動化，從而減低成本，例如你去睇醫生一定會見到有一大個櫃放滿病人病歷，要花人力、時間同地方，如果可以將呢d資料電子化就好啦。

今次好高興 Net Caves 嚟同我地分享一吓呢方面嘅發展情况，個talk我安排咗係我教個科 “HC46003 IT and Instrumentation for Health Care” 舉行，其他同學，尤是讀Computing的，歡迎出席，詳情如下：

Speaker: Ms. Sun, Net Caves HK Ltd.

Date: 18 March 2009

Time: 930-1130am

Venue: Room 1005 (will change to a larger room if oversubscribe)

唔係HC46003嘅同學請先到10/F找Miss Wong Wong報名。

~~~~~~~~~~~~~

[18 March 09 update]

好多謝 NetCaves 嘅Peter同Uwins百忙中抽空同我d學生講吓Electronic Patient Record (EPR) 嘅最新發展同埋未來市場嘅潛力，我都學咗好多嘢，例如SOAP、ICD-10 coding system、互換資料嘅XML HL-7 standard… 等。Uwins仲 demo咗佢地公司嘅WinMed 軟件添，好 user friendly，可以幫到d診所自動化，佢地收費採用 subscription 形式，每月幾佰蚊，好多診所都負擔到，佢地話最大阻力有時係來自醫生，香港都有幾間醫療集團採用咗 WinMed 啦。學生反應最積極係Q&A，因為有4GB手指送！勁無耐，真失禮~~~

我地讀 Computing 嘅同學因為有堂上而黎唔到，可惜，其實 NetCaves 嘅成功可以借鏡一下：找到市場需要，用自己學過programming 嘅知識寫個軟件出黎，既可得到滿足感亦可以有收入；話你知 WinMed 都係由3個人一齊寫出嚟架！

好有用的一個講座

Articulation Talk – Middlesex University

好多有用嘅資料啊

今日有英國Middlesex 大學嘅兩位代表Alan同阿Kay嚟同我吔同學傾下去英國升學嘅情况。間大學有幾個Campuses, 分佈於倫敦北面，Kay講左生活在London嘅點滴，搭地鉄啦、住啦、食啦…我讀書時期都有唔少時間係London到處遊玩，真係好懷念… 同學都問左好多切身問題，阿Kay對好多去英國讀書要留意嘅事項都好熟悉，成本人肉字典！ 佢提議要盡早報名攪手續、申請學生簽証等。佢特別提一提以下:

1. 香港英國文化協會有獎學金申請，Deadline係28Feb09，仲有幾日咋！
2. Middlesex香港辨事處會減￡1,500學費比我地d成功申請入學嘅同學，Kay仲話唔排除再減多d比我地極力推薦嘅同學潻！真係好消息呀！

佢地仲好好人送咗d紀念品比我地兩位同學。

~~~~~~~~~~~~~~~~

號外！號外！

[26Feb09] 最新消息，經我社長推薦嘅學生可以有額外￡500第一年學費嘅減免! 即是如果你去讀兩年，第一年學費減￡2,000！！ 第二年減￡1,500！！如有興趣，聯絡我啦！

舊生分享 – 入U分享篇

你擔心前途嗎？

PAD同學應該正為選科、升學煩惱，我地今日有三位舊生返嚟探望我哋順便同同學分享一下佢地當初讀PAD選科嘅心路歷程。三位分別係阿施、阿穎及Patrick，佢地分別係讀緊中大、港大及SPACE Top-up。

佢地都係由PAD，入我地School讀AD，然後成功入大學，佢地嘅經驗應該值得參考。

日期：20Feb09

時間: 下午3點半左右

地點: 10樓1002室

~~~~~~~~

後記

衣錦還鄉

三位舊生同PAD學生傾咗一陣，講吓佢地入U嘅經驗及揀科嘅心得，佢地仲show左佢地以前嘅畢業作品同現在讀書嘅狀況。

完左個talk之後，我就帶佢地睇下自佢地畢業之後我地添置嘅新設施，首先係902新設立嘅「網絡實驗室」，入面有網絡大皇之稱「思科Cisco」產品，比我地電腦課程嘅學生多d實戰經驗，阿Pat喺HKU SPACE讀緊電腦網絡工程，佢見到個Lab留哂口水！我歡迎佢番黎sit堂，或者做我地part-time T.A.咯！ 跟著帶佢地去704睇workshop同個studio，佢地見到直頭發哂癲！所以話而家讀緊嘅同學你地要知道有幾幸福呀，師兄師姐冇你地咁幸福有咁多架生，一樣可以做到d好嘢出嚟，你地要盡量利用一下，發揮所長。最後我請佢地去「中東軒」食tea，佢地都好掛念d下午茶歺同中東軒嘅姐姐們。

每次同番d舊生傾下都好開心，做老師最開心就係見到學生揾到目標、全力以赴、做個對社會有貢獻嘅人！阿施、Wing、PatPat，記住update下我地啊，例如生仔呀、結婚呀、失戀呀，攞獎呀…等等。

Articulation Talk – University of Northumbria

Nick Spencer of UN

今日請到英國Northumbria大學設計學院Nick Spencer同我地同學傾吓升學嘅問題同埋佢地d課程，佢地畢業生有好出名嘅Jonathan Ive，Tim Brown… Google 一下佢地你就知有幾勁。跟著Nick同產品設計嘅學生上咗一個workshop要佢地設計一套刀叉，比佢地體驗一下有名氣嘅外國設計學院係點樣上堂。同學表現積極。

Articulation Talk – Portsmouth University

Studying in UK?

踏入最後一個學期，同學開始為升學作出計劃，尤其是Final year學生。今日有英國Portsmouth大學嘅代表Andrew同我地d同學介紹一下去英國讀書要注意的事項同埋佢地大學的課程與設施等，同學都好有心機聽亦問咗好多問題。

我地會攪多d前途及升學嘅talk，記得留意呢道啦，下一次talk係18號由英國Northumbria大學設計學院Nick主講。

升學輔導 – 網上版

Add我哋啦！

最近PAD嘅同學正為升學而煩惱，呢幾日我都收到一d查詢。其實佢地遇到升學問題，好多時都會同家人商量，要同學山長水遠同埋家人嚟學校找老師商量，倒不如利用科技，等佢地食完飯、安坐家中，直接同我傾吓啦！所以我會喺以下時間on-line，歡迎你同屋企人一齊同我用Facebook chat吓前途問題，其他同學都無任歡迎架！

日期: 2009年2月16日至20日(星期一至五)

時間: 晚上11時至12時

服務時間會因應需求而延長，當然我亦歡迎同學到我十樓辦公室面談。祝前途無限。

Articulation Talk 升學講座 – 城市大學篇

Articulation Talk - Dept of Information Systems

收到城市大學 Dept. of Information Systems 嘅邀請，佢地會舉辨兩塲升學講座，解釋下佢地嘅課程，我略睇過佢地d課程，如果你鍾意睇下點樣利用資訊科技去推動商業運作，相信你會有興趣。我地school嘅同學同埋BA嘅同學千祈要出席啊！

第一塲: 20 Feb 09, 1830-19:20, Y4302, CityU

第二塲: 21 Feb 2009, 13:30-16:20, LT11, CityU

Non-Jupas 入大學 – 如何寫Personal Statement

最近係申請入大學嘅高峰期，我收到好多要求要寫recommendation，其實我會比足200%心機去寫，但喺我一定要有d嘢喺手先可以寫到封好信，簡單d講，我封信嘅Quality同我知道你有幾清楚成正比，你喺學校嘅一切，我梗知啦，但係有冇其他嘢值得講呢?任何大學申請除左睇成績之外，一定會睇你有冇積極參與校內、外嘅課外活動呢？有冇擔當任何職位？如學生會幹事、搞手等；有冇個人興趣？如攝影又攞過獎咁；有冇體育活動？如游泳並攞過多屆聯校冠軍咁。基本上呢個世界競爭十分激烈，大學一定想要文武雙全、動靜皆宜嘅學生，如果你係Year 1或PAD學生又想入大學，你今日就要開始準備，參加多d公益活動，培養個人興趣，增取好成績。

講番application，你地應該同時比個CV(或叫做Resume)我，列出你教育背景、成就…等等；你未寫過就襯呢個機會練下，Library有好多教人寫CV嘅書，或者比我幫你改下。

我想講吓Application入面嘅Personal Statement，我好奇怪有d同學仔只係寫一、兩句，有d有錯字、文法錯，有d甚至唔寫添！ Personal Statement係好重要，我喺網上揾到一篇幾好嘅指引，喺香港嘅英國文化協寫嘅，喺呢道我撮要一下：

Personal Statement 要：

1. Like Advertisment
2. Simple and Precise
3. Specific: focus on your top choice (may be two), check any modules matching your interests and write around that.
4. Answer these questions: Why you? Why this subject? Why this course? What makes you so suitable? What do you hope to do in the future?

仲有d技巧喺上面份pdf有，值得Download落嚟睇睇。如果你收到大學通知面試，要第一時間通知我地，我會同你做模擬面試及傳授面試秘笈。Good luck！

Articulation Talks 升學講座 – 英國篇

英國升學講座

Final year嘅同學相信開始為自己嘅去向做準備，有d同學會考慮去英國升學，英國係一個唔錯嘅讀書地方，喺外國讀書有好多好處，可以增廣見聞之外，你嘅英語能力一定會進步不少，你嘅自立能力亦會提升，值得考慮。我地喺二月邀請咗3間英國大學嚟同我地嘅同學傾吓，佢地同我地嘅School係有協議，基本上我地School畢業學生可以excempt一年至二年，詳細情况會喺個Talk道介紹。

記住呢個Talk係歡迎全校同學，我已經同所有講者講咗，所以佢地會先講吓留英讀書嘅事項、好處，跟著會介紹佢地間大學及所處的環境，最後先講同我地School傾咗嘅課程。

留意第二個Talk第二部份，啊Nick喺教Product Design，佢好有心，想比我個School嘅學生一個hands-on workshop，所以讀Product Design嘅同學有福啦，唔駛去英國都可以體驗一下英國式上堂呀！Year 1同學必須出席，Year 2及其他同學喺鼓勵參加。

記住報名到Room 1001揾Miss Wong Wong登記。仲有，如果你有心諗住今年年中出國升學，要開始留意外幣嘅走勢，澳、紐及英鎊比高位跌咗幾多吓。

大學入學面試十大常見問題

from 明報

喺好耐以前嘅明報save落嚟，放喺道比同學們參考一吓。要記住面試好多時會用英文架。Good luck!

中大工程學院講non-jupas入學事宜

喺11日12号，首屈一指嘅中大工程學院嚟同我地d同學介紹課程及非聯招入學要注意嘅地方。工程學院副院長何教授介紹佢地嘅威水史，教授及設備都喺世界級！同學仔真喺要比心機讀書爭取入去咁一流嘅大學及學院升學啊！我哋不少入咗中大工程學院d師兄會不時返嚟同你地打氣。何教授又指07/08年度工程學院收咗超過90個非聯招新生！

中大工程學院副院長(學生事務)何教授

今年聯招初步統計數字

明報2008年12月5日

大學聯招申商科人數急降首三志願報教院課程增三至六成

【明報專訊】2009年度大學聯招截止申請，受經濟逆轉威脅下，今年學生傾向選擇畢業前景較「穩陣」 的專上課程，首三志願(Band A)報讀教育學院的人次增一成，中小學英文教育課程首三志願報讀人數較去年茘升33%至60%。另一方面，多個商科課程報名人次則見下跌，科技大學工商管 理課程報讀人數較去年大跌兩成至1487人，與2005年高峰期有3382人報讀的盛况有天淵之別。

六個建議給想由非聯招入大學的同學

我喺十月在Lecture Theatre present咗我的六個建議比今年想由non-jupas方法入本地大學。當時同學反應非常熱烈 , 所以我修改咗D放上嚟比其他同學參考一下。記住各大院校的Deadline(睇我另外一個post)，仲有記住完成申請之後，自己留一個申請文件的副本，並比我哋office及教務處每道一個copy，作為日後你所申請的院校向我哋查詢為依據。祝大家學業進步，入到想讀嘅degree課程及大學！

有時間仲要去考吓IELTS，攞到6或以上就最好啦。

為同學提供升學意見

又快到各大院校non-jupas報名嘅時間，除咗你哋可以在八樓(如图)同我傾吓之外，歡迎大家利用呢個blog同我傾吓、e貓我又得或約個時間面談都得。

正解答同學對升學的問題

09/10 Non-Jupas Deadlines

各同學要留意各大院校今年報non-jupas for 2009/2010 entry 的報名時段。我做咗個圖，一目了然。如有乜問題，歡迎找我傾傾！

Non-Jupas Deadlines for 09/10 Entry

薪火相傳

好高興我哋两位有心既第一屆畢業師兄抽空返嚟同我哋應屆畢業生傾吓升學及就業問題。Jeremny現在是CUHK讀緊最後一年，成績不錯，仲打低咗好多由傳统途徑升上嚟既同學！Ivan現在己經有自己的design公司，佢在呢個summer仲請咗我哋兩個應屆畢業生到佢公司做暑期工，增加知識及實戰經驗。我都好幸運可以教過佢吔。現在讀緊D同學要加把勁，佢吔得，你哋都可以架！

師兄返嚟探我吔