志明與春嬌
好耐都冇入戲院睇戲，今日行過戲院咁啱fit到時間，加上網上影評都唔錯，於是入塲。套戲係講現代男女愛情，故事環繞一班煙民喺街道「打邊爐」而男女主角因此相識，雙方對大家都有好感，可惜男方剛結束一段愛情，所以對於呢段新感情比較被動含蓄，女方反而大方直接。
返到屋企睇到一篇報導話套戲初初上時票房十分差勁，差D要好快落畫，但因為網络上好多正面評論，現在票房五佰萬在望！千祈唔好睇少Web 2.0嘅威力。套戲係小本製作，冇特技，冇大卡仕，只有靠講故事嘅技巧同编劇嘅功力，導演彭浩翔應記一功，特別喜歡佢用嘅電影配樂，好想買隻CD聽下，演員好似做番同自己距離不大的角式所以都演得自然，楊千嬅令我諗起佢喺「每當變幻時」做阿妙做得幾好，年纪同Eason差不多，但呢套戲佢演得比余文樂大七、八年，有D年龄距離；仲有，有一幕男女主角喺後巷煲煙時望住個膠袋被風出起，呢一幕好熟面口，唔記得喺邊套西片有類此場面，有冇人知? 唔知宜家80後談情是否這樣？七日因悶而發生一段新感情，同人一齊五年明知對你唔好又唔分手，見到新目標好d就過檔，唔通感情好似水泡一樣，騎牛揾馬乎？另一套「月滿軒尼詩」同樣是愛情小品，但描寫嘅感情就比較細膩d。
套戲有大量粗口同低俗笑話，所以被評為三级。可以去官網download劇照及Wallpaper。
Posted by 社長 
