A new chapter… 請移玉步

Welcome to my new blog!

人生充滿大大小小的結束與開始，不經不覺寫呢個blog都有兩年幾，佢對我就好似一本日記咁，宜家睇番一d舊post都百般滋味… 我間中都收到一d從未見過面嘅人嘅comments，科技將好多野拉在一起。我希望我寫d野會令你地諗多一d，我亦會開展我另一個chapter，所以會開一個新blog繼續我的博客生涯！上面照片就是我的新blog地址，歡迎指教。

QR Code Teaser – 1 這是什麼〔一〕?

科技改变我哋生活習慣，並帶來好多新事物、新思維及新革命，你都可以成為Google或Apple架，只要有創意！我地就係鼓勵學生左、右腦並用，發揮創意。

照我吧！

用高科技同大家玩個遊戲，上面個圖叫做QR Code，喺曰本好流行，佢原理好似Bar Code咁，用圖像黎儲資料。點玩法呢？右手邊有兩個Java檔，download落你部手機道執行，然後用你部手機對住上面個Code影張大相咁你就知喺已嘢回事，有嘢睇不妨攞架手機上office比我睇吓，最多請你食嘢。(程式在測試階段，但Nokxx手機表現最好)

On Radio 「知識迎人」 – 四月號

新城997

6 April: 講電台數碼廣播。

新城節目 06 April 2010 錄音

13 April: 虛擬實景AR。

新城節目 13 April 2010 錄音

20 April: 成功web apps要有乜特點。

新城節目 20 April 2010 錄音

27 April: 公共WiFi上網。

新城節目 27 April 2010 錄音

(節目係逢星期二晚8:30pm新城FM99.7MHz)

電影「志明與春嬌」 Movie “Love in a Puff”

志明與春嬌

好耐都冇入戲院睇戲，今日行過戲院咁啱fit到時間，加上網上影評都唔錯，於是入塲。套戲係講現代男女愛情，故事環繞一班煙民喺街道「打邊爐」而男女主角因此相識，雙方對大家都有好感，可惜男方剛結束一段愛情，所以對於呢段新感情比較被動含蓄，女方反而大方直接。

返到屋企睇到一篇報導話套戲初初上時票房十分差勁，差D要好快落畫，但因為網络上好多正面評論，現在票房五佰萬在望！千祈唔好睇少Web 2.0嘅威力。套戲係小本製作，冇特技，冇大卡仕，只有靠講故事嘅技巧同编劇嘅功力，導演彭浩翔應記一功，特別喜歡佢用嘅電影配樂，好想買隻CD聽下，演員好似做番同自己距離不大的角式所以都演得自然，楊千嬅令我諗起佢喺「每當變幻時」做阿妙做得幾好，年纪同Eason差不多，但呢套戲佢演得比余文樂大七、八年，有D年龄距離；仲有，有一幕男女主角喺後巷煲煙時望住個膠袋被風出起，呢一幕好熟面口，唔記得喺邊套西片有類此場面，有冇人知? 唔知宜家80後談情是否這樣？七日因悶而發生一段新感情，同人一齊五年明知對你唔好又唔分手，見到新目標好d就過檔，唔通感情好似水泡一樣，騎牛揾馬乎？另一套「月滿軒尼詩」同樣是愛情小品，但描寫嘅感情就比較細膩d。

套戲有大量粗口同低俗笑話，所以被評為三级。可以去官網download劇照及Wallpaper。

10 Golden Rules for Building Successful Web Apps

創投人Fred Wilson係二月一個講未來Web Apps的研討會上，講咗Web 3.0時代，Web Apps要成功，應要具備什麽特色？

1. Speed
2. Instant Utility
3. Voice
4. Less is More
5. Programmable
6. Personal
7. Unique URL
8. SEO
9. Clean
10. Playful

想知多D？中文版同Video都有，值得睇下。

On Radio 「知識迎人」

新城997

15Dec: 節目講下FOXY軟件又累到政府部門出事，究竟我地有乜野喺資訊保安上要留意？

新城節目 15Dec09 錄音

22Dec: 聖誕節快到，各大廠家都趁呢段時間推出新產品，你揀咗礼物未？我就推介咗d電子產品，最啱比教書嘅朋友用。

新城節目 22Dec09 錄音

29Dec: 有冇聽過”Augmented Reality” AR呀？我會講吓出版業要求變，都用咗呢種技術，同埋電子書的發展。

新城節目 29Dec09 錄音

12Jan: 一年一度嘅消費電子展覽又喺LasVegas開波啦，今集同大家講下各大廠家有乜百宝show出黎啦。

新城節目 12 Jan 2010 錄音

19Jan: Google懷疑比黑客入侵，仲話要撤出中國，今集會討論一下。

新城節目 19 Jan 2010 錄音

26Jan: 有冇係Facebook見到捐錢比海地的呼籲？究竟是否Spam？怎樣防止？乜叫Web3.0呢？Personalised Web又係乜？

新城節目 26 Jan 2010 錄音

2Feb: BBC會用3D轉播足球賽，究竟乜叫做3D movie呢？阿凡達用左乜技術做3D呢？

新城節目 02 Feb 2010 錄音

9Feb: 電台是否夕陽工業？電台人係咪要利用多d新媒体作誇媒体演出？內地會用6千億將三網鎘合，究竟係乜東東？

新城節目 09 Feb 2010 錄音

16Feb: 農曆新年又到啦，YouTube喺呢個時候話攪出租Video喎，動機一定係增加收入啦，但係會唔會成功呢？

新城節目 16 Feb 2010 錄音

23Feb: 網络2.0時代已经來臨了很久，Google係當中嘅表表者，但係最近比Facebook扒咗頭，Google便推出Buzz嚟反擊，得唔得呢？

新城節目 23 Feb 2010 錄音

2Mar: 最近有報告指出6-29歲愈來愈多人患上「網引」，點為之上引呢？成日話阿凡達票房好勁，你知唔知一隻成功嘅Game都可以，成本比拍阿凡達低好多。

新城節目 02 Mar 2010 錄音

9Mar: 最近西班牙一批Bot-net黑客落網，乜叫Bot-net呢？我地點樣可以避免資料被垐？

新城節目 09 Mar 2010 錄音

16Mar: PS3最近出問題，原因係一粒零件計錯日子！有冇想起千年虫事件？南韓有對夫婦打機打到餓死個BB!

新城節目 16 Mar 2010 錄音

23Mar: 最近好多人玩微博，究竟係乜東東？又會介绍吓Plurk呢個同Twitter差唔多嘅嘢。

新城節目 23 Mar 2010 錄音

30Mar: Google嘅Street View終於係HK面世啦，但係亦帶出好多私隱問題，仲有Microsoft想禁止員工用iPhone喎。

新城節目 30 Mar 2010 錄音

揀筆記 Find the right pencil

KuruToga HK$38.0

最近改緊學生孝試卷、功課、習作、report、presentations…etc. 成幾叠橙色野放喺枱面，真係改到人都癲！  除咗用紅筆之外，就用鉛筆改，office平時用開d鉛筆要刨，冇咁方便，襯食晏去中南買支機械(自動)鉛筆用下先。回想中學時代，邊有電腦用呀，上美術同繪圖堂時都會用到機械鉛筆，現在d學生好難想像要用T尺、圓規同A2紙畫嘢，我就係咁練得一手好字架，果陣時嘅文具市場未被日本製造拈據哂，高級嘅西德牌子就係班中有錢同學所採用，有冇聽過Staedtler, Faber-Castell 同 Rotring 呀？我就當然係窮鬼，只可以用日本Pentel P200，宜家仲有得賣架！長青design賣幾十年都得；會考繪圖我係攞A，証明係唔關器材嘅事，當時我地一致認為筆皇係黑色Rotring 600，成支六角形，宜家已經唔再出(ebay賣緊成千銀)，呢一代無人對筆有太大要求咯，電腦取代哂d手工嘢，欠缺一點浪漫。

呢十年日本文具打低哂德國野，好可惜架，我好欣賞German design，可惜佢地固步自封，比日本嘅創新設計、市場策略同低價錢打低哂對手！好似我買呢支新鉛蕊筆咁，Uni-ball KuruToga， 有乜特別？平時鉛蕊筆支鉛蕊一路寫一路會削尖哂，寫野會變粗同易斷，呢支一路寫支鉛蕊一路會轉，好設計！文具設計好好玩架，得閒去中南研究一下d筆，背後有好多設計者嘅心思。宜家睇番呢d德國大牌字筆嘅設計，已經冇哂歐洲個性，同日本製造冇乜分別，唉！

Movie “Avatar”

大製作

導演Cameron話拍完Titanic就開拍呢套戲，前後講咗十幾年，09年尾終於有得睇啦！本來想去新UA iSquare 睇數碼3D IMAX版，但係爆到年尾！好耐都未見過有套戲可以全院滿座！於事轉去圓方睇。

套戲故事好簡單，觀眾好容易產生共嗚，人物描寫直接簡單(港產特技片常欠的原素)，故事流暢，特技超一流，絕對抵睇、好睇。套戲成160幾分鐘，戴住個立體眼鏡雖然話唔算太辛苦，睇完雙眼同個頭都罄合合咁，第時話屋企部電視都有3D，長期戴眼鏡都係一個鄣礙。翻查資料，套戲budget大概美金$300 million，另以US$150m做marketing！唔怪得可以發展自己嘅3D攝影機。

同d學生講開戲，似乎大多數對導演唔多留意，佢地對Titanic都知嘅，不過大多數以為Cameron係讀電影出身，其實佢對電影同特技嘅知識全部都係自學番黎，佢大學Major哲學但未完成學業，出黎乜都做過，貨車司機又做過，邊做邊寫吓劇本咁，入行都係由低做起，一步一步捱上去。佢所拍嘅戲最經典係Terminator啦，當時係好震撼，就算宜家電視台都仲抄緊呢條翹，咁你就知利害啦！你未睇過就快d揾隻DVD睇。Cameron點會諗到Terminator呢條好翹架？佢話當時趕拍一部爛片，又冇budget，故事又低B，成日比老細追交貨，攪到連發夢都夢到有個機械人殺手由未來返到現在追殺佢，呢條咪Terminator條蹺咯，服未？又証實人喺壓力下先有好野出黎！

Merry X’mas and a Happy New Year 2010!

夢想成真！

真係又到聖誕！今年都無驚無險又過一年，工作沒有減少過，可能正所謂 “No pain no gain” 嘛！預計未來工作環境將會有好大嘅改變，又或者所謂「變幻原是永恆」嘛！都要積極面對。家庭方面亦有好大改變，需要更多嘅精神去承擔更多責任。

在X’mas Eve送上一些祝福：身體健康、新年進步！同事們事業順利、工作中嘅畢業生事業蒸蒸日上、正求學嘅畢業生學業順利，得閒返嚟傾吓、朋友們事事順利、家人一切安康；最後比我d學生：一年又過去、不要浪費青春，失敗唔緊要，最緊要學到嘢唔會再錯第二次。

鬼才 Philippe Starck

Philippe Starck

衆多設計師當中，叫Philippe Starck 做「鬼才」應該當之無愧，佢由室內設計、傢俬、燈飾、交道工具、日常用品到內衣衫褲鞋，佢都有份！法國出世嘅佢，獲獎無數，佢嘅理想係要將好嘅design盡量可以比多d人擁有，唔係淨係比一小撮有錢人。佢講野同行為都好出位，喺08年講話佢所design嘅一切一切都係多餘嘅，仲話design已死！又話做多兩年就退休喎，係咪飲大咗呀，今年先果60歲！係嘅話就出年2010咪再見唔到佢嘅作品囉？快d收集吓佢d野先！最近有多個2.5″ HD想揾個靚仔殼比佢，哈，咁啱LaCie揾咗佢design咗2.5″ 同3.5″ HD Case ：

Starck Lacie Mobile

我喜歡佢用咗好厚嘅鋁，散熱好d又型，果條cable收埋喺後面係一絕！以後唔駛驚唔見咗條cable而煩，呢d就係好嘅設計。買呢個野要連HD一齊買，冇話淨買個殼，好彩有人認頭跟黎個320GB HD，咁我就要拆開佢，唔駛用鏍絲安裝已經係產品設計嘅norm啦，呢個Starck mobile case用咗兩條膠「迫」住個殼，所以唔駛用鏍絲，慳番d零件。

Inside the Starck Mobile Case

Starck最近同英國BBC2電視台合作攪咗個Reality Show 叫”Design for Life“，形式好似”The Apprentice”、”Project Runway”、”America’s Next Top Model” 咁，由全國幾百位參賽者挑選左12位產品設計學生進行淘汰賽，勝出嘅幸運兒可以跟鬼才大師實習半年！總共有6集，上網揾吓啦(episode 1-6)！想聽吓鬼才大師講乜叫design,快d去呢道啦！

On Radio 「知識迎人」

新城997

國家成功研製「天河一號」超級電腦，究竟佢同其他超級電腦點比較呢？超級電腦有幾勁同又有乜用途呢？喺10Nov同17Nov兩集會解釋一下。互聯網域名好快可以用英語以外的文字，24Nov果集會講下佢對internet嘅影嚮。新聞報導國與國之間已經發展緊電子網絡爭霸戰，互相攻擊對方的電腦及網絡，01Dec果集會講吓呢方面同黑客的問題。最近立法會草擬緊網上版權法，你又點睇呢？08Dec果集會討論吓。

電台：新城資訊台 (FM99.7–102.1MHz)

節目: 知識迎人

日期、時間： 10,17, 24 Nov  2009; 1,8 Dec 2009; 8:15-8:30pm

新城訪問 10Nov09 錄音

新城訪問 17Nov09 錄音

新城訪問 24Nov09 錄音

新城訪問 01Dec09 錄音

新城訪問 08Dec09 錄音

勵志故事: 周杰倫

萬人景仰

阿Jay已經係天王級數，好多年前當CSL揾佢做代言人時曾經有近距離接觸，當時心諗呢位仁兄木木獨獨咁，又冇表情又唔笑，點會紅架！點知d女仔見到佢一出黎，直頭發哂癲！不過佢d音樂造詣又幾好嘅。

有日睇咗佢嘅出生，非常感動，睇完之後對佢及Jay媽非常敬佩，我將呢個感人故事同我某一班同學分享，希望可以鼓勵佢地，有人想睇下、鼓勵下自己，可以去呢道。

睇完之後你要明白堅持和勤力的重要，同埋要孝順父母 — 特別是媽媽！

Movie “Storm Warriors” 風雲II

1998年的製作

我以前做果間電影特技公司係98年將馬榮成嘅巨作「風雲」漫畫拍成電影，仲揾咗「成成」同「e面」做聶風同步驚雲，特技一定唔少得，98年嘅PC係慢到抽筋(講緊p2行450MHz)，其中有一場戲要用到超級電腦SGI Onyx去做rendering! 當時SGI殺哂所有digital visual effects市場，當時買部Onyx嘅價錢可以買一個800呎住宅單位！轉眼十一年，現在SGI面臨破產，同埋風雲II由彭氏兄弟再拍。

2009年的製作

第一日上映，特別走去至愛嘅圓方Screen6睇，首先声明我唔係黄玉郎、馬榮成嘅粉絲，可能因為咁我對故事唔太投入，仲覺得有d悶同無聊添，在人物描述欠奉之下，就睇下特技咯，負責特技嘅一間本地公司FatFace做，老闆/創辨人係舊同事。風雲II特技有哂「戰狼300」、「蜘蛛俠」、 「Sin City」、 「魔界」、「哈你波特」，「X-Men」嘅特技精髓，短短喺18個月可以做到都好野，不愧為香港精神！留意咗完嘅credits，每一場特技都列咗負責果場嘅人員名單，比較小有，證明咗一份嘅尊重，留意就算最復雜果場戲嘅特效都係十個人左右負責，佢地都唔知挨咗幾多通霄！勁！有個憂慮，個credit list有好多製作人員(如灯光、攝影、佈景)都係秦國人，我知套戲係喺泰國拍，佢地可以平、靚、正取勝，究竟未來香港電影製作應該走一條乜路呢？

幾米與時代廣場

吹喇叭

消費推動經濟，那怕不環保，各大商場紛紛花費百萬去吸引人流，卡通人物做主題就最受歡迎，脾脾熊、QQ貓、史諾比狗… 時代廣場上年用本地Artist，今年就請大師「幾米」做主題，今日下奏去好多人，一家大細咁周圍影相，好有節日氣氛，相信各大商場今年進賬會不小，尤是自由行嘅收入。

幾米是何許人，大家都認識，佢嘅繪本賣到街知巷聞，真係唔駛做咯！但係成功背後都有一個辛酸故事：幾米讀書時已顯露出畫畫天份，到高三下學期有同學說要去考美術系，幾米才知有這個科目，於是幾米就跟著報了美術系。大學裡的同學畫畫都很棒，幾米覺得很自卑，又害怕「當一名畫家會餓死」，於是選讀了設計組，希望出路好一點。畢業後在廣告公司工作時，幾米隨身攜帶本子，有空就畫圖。「朋友們都說我畫得很爛，像幼稚園學生畫的，但我沒有理會他們。」就這樣，畫了幾個本子。後來，本子給一個性格衝動的朋友拿去皇冠出版社。於是，幾米就開始畫插圖了。

在一個寒冷的冬天，幾米跑去算命，說他將會獨當一面，九五年後事業會平步青雲。1994年毅然辭去做了十二年的廣告公司工作，留在家裡畫插圖，事業漸漸走上軌道了。1995年幾米證實患上了血癌，歷劫歸來的他，更珍惜生命的可貴，以實現自己的夢想，更認真渡過生命的每一刻，積極開始繒本創作。

Handcent SMS

Conversation screen

Android有乜野咁勁呢？除咗爽之外，就係 “Market”啦，iPhone 的成功其中一個原因就係千千萬萬嘅 apps可以從iTunes Store道download，緊係啦，唔通仲鬥hardware 呀，software先可以將硬件有無限嘅發揮，點樣先可以最短時間、最少投資做最多嘅apps呢？就係開放個開發工具同幫程式開發者賣佢地嘅心血。Nokia用Ovi黎抵抗Apple，Microsoft用Marketplace, Android以Market，做得比iPhone更開放，咁多apps，邊d好用呢、邊d係must have 呢？我會介紹一下。

Android跟黎個”Messaging”比較悶d，想似iPhone嘅SMS咁fancy？有計！download 呢個 Handcent SMS啦！

Embrace Android!

Hello little green robot!

最近有機會玩幾架Android手机，首先声明我好buy Google，兩個founders好勁揪同好有vision，我好早已經係Gmail用户，但我手機用開WM5→6→6.5，仲係prefer有鍵盤果種，貪佢快；好啦，第一次用部Android機，企咗係道，又想import d contacts，摸黎摸去，差d想掉咗出窗口，終於轉返WM6.5。過咗一陣，身邊開始多人用，我話哂係IT界先峰，冇理由攪唔掂嘛！於是揾士丹利講下操作，哈，佢一講，我就知Android個model同WM係唔同嘅！天資聰敏嘅我，突然被打通任篤二脈咁，茅塞頓開，功力大增！我宜家已經將部WM6.5機放埋一邊！Android都好爽，緊係啦，源出Unix嘛，佢已經係我生活一部份啦，我會以後係呢道介紹下一d有用嘅apps咁。(Google好快變另一個Microsoft囉，即是佢會成為生活的一部份，致於會否变成另一個大魔頭，要睇Larry同Sergey嘅做化囉)

2012 the movie

末日預言

己經有不少電影講世界沒日，原因都係離不開巨形磒石撞落地球、外星人大舉襲擊人類、天災如大地震、龍卷風… 等，最近幾年就講環保多，例如全球溫室效應，令海水上昇淹沒大城市。”2012″ 就係講古馬亞人預測嘅地球大限將至，人類點樣過渡呢個危機。故事話2012年大陽風暴突然增加，地球南北極互調，攪到地心熱力上昇，火山爆發，海潚淹沒大部份陸地，各國選出(或買位)幾十萬人坐高科技「羅亞方舟」逃難，套戲勁sell發展中國家，例如係印度科學家首先發現大陽風暴劇增、幾艘方舟要靠中國先可以咁短時間製造好同埋要係中國launch先得，連荷利活都認為下世紀係東方嘅天下！套戲d特技好犀利，加上「圓方」重Bass同震震椅=效果一流，但係劇情就麻麻，好多太跨張嘅地方，算啦，睇戲唔好駁故麻，賣特技嘅片好少有好劇情，其實2012都冇冷場嘅，幾十蚊有兩個幾鐘頭娛樂，ok啦。

講開地球天氣轉變，最近有黑客入侵咗英國氣候研究中心，發現科學家似乎跨大咗global warming的嚴重性喎，攪到而家要有獨立調查。

每天求變 Innovate or get extincted!

Esquire Augmented Reality Special Issue

宜家邊會話可以食老本架，每一行都有生命周期 (life cycle)，科技令呢個周期縮短，唔創新嘅話就等於等死！傳统媒体例如印刷業就受到互聯網嘅不斷沖擊，面對愈黎愈小嘅讀者羣，佢地都要諗計攪吓新意思。君子雜誌十二月果期就玩咗 Augmented Reality (AR)，只要單撈及安裝一個software，用電腦個 Web Cam對住雜誌裡面唔同頁數印咗個好似2D barcode 嘅正方嘢，電腦就會出現唔同嘅動畫，同用家互動，果日係Lab道試過，效果唔錯，d同學都玩得幾開心，幾好嘅 gimmick 。其實AR都發展咗好耐，我做postgrade時都好多人玩，可惜個陣好勁嘅hardware先做到，勁貴，難普及！但係宜家連手提電話都可以玩3D咁勁，iPhone都好似有AR嘅 apps，相信隨住smart phone嘅流行，AR會好快流行，好多野玩。

有d朋支或同學都知我用咗QR code好耐，我卡片或你睇緊呢個blog嘅address都有用QR code代表出嚟 (睇下右下角)，蘋果日報最近都開始玩QR code啦，以前傷腦筋點樣揾到個免費嘅QR code reader 比唔同型號嘅手機，宜家蘋果日報就可以用手機打一個電話去，然後會用SMS send條link比你download個reader，試過部Nokia裝個reader，用我個blog試，只要用部手機對住個QR code，就會即刻會跳去我個Blog，好快呀！日本以經玩咗好耐，香港好快會流行啦！

幾好玩呀！

科技對印刷業都好大影嚮，Amazon出嘅Kindle電子書熱賣，另一間網上書店Barnes & Noble 都出咗Nook，好多人都話出ebook reader，似乎電子書將會帶比出版業一次番天覆地嘅改革！

 

如你有創意，那怕沒有出頭的一天？

"9" the movie

好多時d人認為學生作品不屑一看，當然學生佢地嘅技術及資源有限，唔可以同A級荷里活片比，但有d確實係創意一流，天馬行空，所以我反而鍾意去睇下各大院校學生作品，總有d驚喜。最近有套電腦動畫“9″就快上，喺美國9月9日已經上映咗，呢套戲個意念都係嚟自一個讀動畫嘅學生(Shane Acker)畢業作品，只係一套短短十分鐘04年面世嘅電腦動畫，大受fans歡迎，06年更被提名Oscar最佳動畫短片獎，引起鬼才導演Tim Burton 嘅注意，拍成80分鐘長片。今時今日，又 Youtube，又 Facebook，咁多渠道發表，我真係唔多相信再有「懷才不遇」這回事。

Can I be a Product Designer? 我要做「d哂拿」！

Quick Sketch #2

Quick Sketch #1

當Ivan教 Year 1學生 quick sketching 時，我都有留心架，仲練習咗兩幅畫！臨老學畫圖！

薪火相傳 – Quick Sketching Workshop

Quick sketching!

有留意我地個學院消息嘅同學相信對Ivan都唔會陌生，佢係我地第一屆Product Design畢業生，呢兩個禮拜返黎教Year 1學生Quick Sketching，又教用Marker上色，呢d技術對 Product Design 係基本功，希望同學上完呢兩堂要時時刻刻練習一吓，畫功唔係一朝一夕就會好。Ivan仲帶咗佢公司最新嘅USB Hub 同的色 Speaker 仔獎勵兩位畫得比較好的同學，結果由「莊臣」及「卡門」奪得，比心機。

薪火相傳 – Solidworks Workshop

Solidworks 工作坊

分享知識、道理係美德，雖然我做教師大多數時間都是”give”，其實我都有”take”，班上有幾十人就有幾十種不同嘅性格，同咁多人喺短短幾十小時磨合十分唔簡單，同一內容、表達方式，放在唔同班裡面可以有天與地的差別，呢個係挑戰！

學生喺我地個 School 短短兩年，點樣可以令佢地有一身好功夫，應付升學或就業的需要？當然教佢地多d野就最好，但係對於我地蚊型school咁小資源，點做呢，真費思量！好彩我地有一班好好嘅畢業生，佢地雖然離開咗，但係仲關心我地同d師弟妹，好似今日咁，阿 Chapman (我地 Product Design AD剛畢業) 就番黎同d一年級產品設計學生講下 Solidworks 的用法，等佢地快d上手，畢竟 Solidworks 就係 Product Design 嘅左右手！Year 1 學生差不多有六、七成出席率（算係咁架，而家話免費有野學都好難會吸引到學生黎） 。雖然短短兩個星期五嘅幾個鐘，我相信 Chapman 從教學中都學到唔少嘢，三嬴局面，like, very like, very very like！Thanks Chapman!

KWH Time Lapse Project

廣華医院喺1911年成立，服務香港差不多100年，係東華三院一位重要成員，由於要應付市民未來對医療服務的需要，廣華醫院將會分階段擴建及重建，2011年尾會清拆南翼(Phase I), 2014年尾會清拆東與北翼，為咗要保留呢個咁有歷史價值的建築羣，東華三院想揾我地幫手睇下點樣用科技+創意去保存呢片香港人嘅歷史(馬英九總统都喺廣華醫院出世)。

以下是我初步想法，歡迎提出意見。

保存一個建築物拆建的影像，我覺得用Time Lapse最好，一個好例子如下：

要影得好，首要絛件是location location location! 1)要有安全及易進入的地方長期放置相機,並要有電源，最好是一個室內地方並有網絡設施，2)最好可以清楚鳥腑KWH，同時唔可以太背光或對光。

我借助科技先做一個virtual location scouting。先從中原地圖睇一睇個平面地圖:

KWH平面地圖(中原地圖)

2D平面地圖不能顯示附近大廈双對高低的比例，咁就要借助3D地圖幫手：

廣華(e電城)

廣華(Google Earth's view)

首先試下由20/F影出去，似乎比何文田山豪宅佔了景觀，可惜，如果可以借其中一間別墅試下就好啦 ！

由20/F影向廣華(4pm影)

KWH的北面及西面都是商業樓宇及私人單位，如果排除租用的可能性，只有幾個可以有機會「講人情」在東面的locations:

 

 

• 羅裕積小學：被護士宿舍及行政大樓包圍，只有數層樓高，只能紀錄兩所大樓並要用廣角鏡。
• 九龍華仁中學：對正東翼及南翼，但地勢不夠高且比較遠，要用Tele影。
• 真光女書院或安素堂: 偏向護士宿舍，真光地勢較高，同樣要用Tele鏡影。可以一試。

用廣華以東的角度去影番KWH，唔好處係東及南翼佔了相片的很大扁幅，後面的工程是拍攝不到。最理想就係用KWH西或北面去影，如柏裕商業大廈、兆萬中心、潮流特區或登打士街及通菜街/花園街高處影落去呢？雖然光源冇咁靚但可以一幅過，比較impressive。咁有意義的project，旺角區議會可唔可以幫手同各大廈業主立案法團傾下，比我地用下天台呢？又或者謷察放咗d天眼喺旺角，有冇d好嘅location可以搭單呢?又或者朗豪坊用支勁Tele影過黎呢(cost高)？如果以上都行唔通，咁就要分開影，冇咁impressive，例如由Staff Quarter (可惜較矮)及徐展堂近家樂坊。要同d老總傾吓先，實地考察少不了！

“Astro Boy” the Movie

小飛俠電影

阿童木係日本國寶漫畫家手塚治虫筆下嘅一個角式，由於佢已經喺日本家傳户曉，所以當宣佈話有人想將佢搬上大銀幕，仲係話香港公司添，真係汗顏！今晚一於去撑場。去左老遠嘅MegaBox UA睇，間戲院相比圓方真係差d，座位唔夠寬躺，又要岳高個頭睇。套戲個故事比較簡單悶，但又唔見得小朋友睇得好開心喎，隔離個靚仔都訓咗。一路睇，腦海都浮現Pixar嘅 “The Incredibles (超人特工隊)”, “Wall-E” 同Blue Sky Studio嘅”Robots“，先入為主都好緊要架，我相信佢地亦都參考過呢幾部戲。雖然呢部戲已經揾咗荷李活嘅人黎寫故事，但始終Pixar嘅說故事能力喺勝一籌，裡面啲gag都比較爛，可能我睇廣東話版，城城同個細路配音唔夠感情。一套戲如果好睇，其實觀眾唔應該有時間去留意CG技術…阿童木同其他角式略嫌欠缺面部表情，其他都有水準… 呢套戲係香港公司攪嘅，要support吓！

負責製作阿童木呢間本地公司Imagi都幾傳奇，掹車邊咁同我都有dd淵源，下次再講。

“District 9″ the Movie

D9

有時聽人講話懷才不遇，遇唔到伯樂，但自從有咗Youtube之後，曝光機會多咗好多，例如有d創作歌手自彈自唱拍咗條video放上YouTube，好快有星探簽約出唱片。D9呢套戲嘅導演Neill Blomkamp就係拍左條短片放喺YouTube道，比電影公司Sony睇中咗條蹺就揾埋Peter Jackson(魔界、KingKong導演)做監製拍D9。套戲借外星人難民為題，用pseudo-documentary手法，講人性嘅黑暗面，值得一睇。

如有時間睇下Neill原本放係YouTube條片”Alive in Joburg“, 睇吓點解咁勁揪連Sony都買佢版權！Neill係98年讀完個3D Animation & Special Effects短期課程，Youtube有佢Final Year Project條reel喎！值得睇吓。同學要比心機，有創意嘅話，機會比以前多好多，積極參加下比賽，吸收下經驗都有用架。PS: Neill負責拍”Halo”，已經有trailers啦，聽講話有版權紛爭，唔知幾時上映。

On Radio 「知識迎人」

最近熱烘烘嘅科技話題一定係高錕教授因為發明光纖通訊而獲得Nobel Prize, 簡單d講，冇光纖就唔會有寬頻上網，當時通訊係靠電子在導電體(如铜線)中傳送，高教授估計到將來資訴爆堋，要用光先可負載到咁多資訊，真有遠見。牛津大學最近公佈咗個寬頻質素調查，香港有99%家庭有寬頻上網，仲勁過南韓(97%)同日本(64%)! 但唔好開心住，香港嘅寬頻質素只得33分，距離最高嘅85分(日本長崎市)好遠！所以今集(20 Oct)會講吓光纖原理同呢個調查佈告。

新城997

我教咗Multimedia都好多年，有幾位出色嘅學生特別記得，其中對「桂濱」同學個印象特別深刻，佢04年成立咗間動畫公司Many Many，而家攪得有声有色，最近佢地幫McDull電影做3D動畫，呢兩集(27 Oct. + 3 Nov)會同桂濱傾吓佢創業嘅歷程同未來香港動畫發展方向。留意、留意！

電台：新城資訊台 (FM99.7–102.1MHz)

節目: 知識迎人

日期、時間： 20+27 Oct, 3 Nov  2009, 8:15-8:30pm

與桂濱大合照

新城訪問 20Oct09 錄音

新城訪問 27Oct09 錄音

新城訪問 3Nov09 錄音

太遲 ‧ 太早 too late? too soon?

高錕、奧巴馬、諾貝爾

我上ITMA堂都花咗d時間講吓光纖同應用，當時冇乜學生識邊個係「光纖之父」，更加唔知佢87至96年間曾經係中大校長。如果冇咗光纖，都唔知會係一個乜野嘅世界，試諗吓，冇寬頻，冇YouTube… 我d學生一定會叫救命！如今高錕得到呢個殊榮，係實至名歸！不過最近睇新聞知道佢患上老人癡呆症，唔記得自己嘅偉大發明，睇到段片真係有d心傷… 個獎如果早d比佢，你話會幾好呢？我又記得中大學生曾經強烈抗議佢獲北京委任為港事顧問，打斷佢演講、搶佢支咪同當眾鬧佢，難得嘅係高校長冇嬲，呢d學生，呢幾日有乜感想呢？香港其實都有好多重量級科技人才，但佢地好似無被好好「利用」，皆因港府沒有科研政策，長期側重金融地產，香港淨靠食老本遲早完！

另一邊廂，諾貝爾和平獎剛宣佈由美國現任總统奧巴馬獲得，諾貝爾獎係需要幾個月提名時間，即是話佢上任十幾日就被提名，冇成績可言喎！Obama真係咁charming? 無可否認佢演說技巧一流，但佢以乎到宜家都未做到有乜野成績，呢d係咪叫時來運到呢？

別做「好人主管」 No more Mr. Nice Guy!

分享一篇文章：

父母師長教我們要做好人，但原來好人顧慮周全，為令身邊的人感到愉快，較易累積壓力。其實人有兩面，沒有永遠的好或壞，問題在於，在甚麼人或情況下做「好人」。

職場中，我們經常希望有個好人當老闆、上司甚至是下屬。但原來一個好人，未必是一個好主管。因為「好人主管」的其中一個特色，是無法嚴厲要求下屬工作，長此下去，下屬不會有進步，一旦被調往別的地方或轉工，就很易被嫌工作能力差。

甚至可以說，「好人」是當不到主管的。因為「好人主管」既不想令下屬討厭自己，又不敢開罪上司，行為變得矛盾，最後無法取得任何人的信任，只會被下屬看不起，被上司忽視，成為「夾心餅」。

所以，要成為一個好主管，需明白要時忠時奸，要有自己的立場和看法，對男女下屬不偏不倚，重視關係爭取共鳴，多於在乎自己是否夠好人。

~ 摘自經濟日報2009年9月17日

小小東西，多多用途 Little things, big help

芝蔴樽

今日食晏，去咗一間手打烏冬，枱面見到呢個樽，好鬼得意，佢係要黎磨d芝蔴落d嘢道，我唔知點解芝蔴咁細都要磨，同埋磨完之後d芝蔴瀋落d烏冬道、或是d飯送道呢？真係要問下人正確嘅用法咯。

what does it do?

跟著去咗行下無印Muji，買咗個咁嘅野，你估下有乜用途？

其實身邊有好多野好得意，值得細心留意，如果你係讀product design就更加要啦！